Áskriftaraðir

Jólatónleikar

Tue, 1 Dec 2009 23:27:00 +0000

Jólatónleikar Sinfóníuhljómsveitarinnar eru löngu orðinn fastur liður í jólaundirbúningnum. Að þessu sinni verður leikið fallega ævintýrið um snjókarlinn með tónlist eftir Howard Blake og Páll Óskar mun bæði segja söguna og syngja af sinni einstöku list.

Óperuveisla Kristins Sigmundssonar - Tónleikar á Listahátíð

Mon, 24 Aug 2009 01:17:00 +0000

Varla hefur nokkur íslenskur óperusöngvari náð jafn langt í sínu fagi og Kristinn Sigmundsson, sem er fastagestur í virtustu óperuhúsum heims og fær hvarvetna mikið lof fyrir flutning sinn. Skemmst er að minnast þess þegar hann söng hlutverk Ochs baróns í Rósariddaranum við Metropolitan-óperuna í beinni útsendingu um allan heim, meðal annars á Íslandi.

Nú heldur Kristinn sína fyrstu einsöngstónleika með Sinfóníuhljómsveit Íslands um langt árabil og má fullyrða að eftirvæntingin sé mikil. Á efnisskrá tónleikanna hefur Kristinn sjálfur valið nokkrar af sínum eftirlætis aríum, meðal annars úr Rakaranum í Sevilla, Don Carlo og Hollendingnum fljúgandi.

60 ára afmælistónleikar SÍ

Mon, 24 Aug 2009 01:12:00 +0000

Í mars 2010 eru liðin sextíu ár frá því að Sinfóníuhljómsveit Íslands hélt sína fyrstu tónleika í Austurbæjarbíói. Af því tilefni verða haldnir sérstakir hátíðartónleikar og flutt hin stórfenglega sinfónía nr. 2, „Upprisusinfónían“ svonefnda eftir Gustav Mahler.

Sögusinfónían + 3

Mon, 24 Aug 2009 01:06:00 +0000

Sögusinfónían eftir Jón Leifs er tímamótaverk í íslenskri tónlistarsögu. Verkið var samið í Þýskalandi á árum seinni heimsstyrjaldarinnar, sem mótmæli við afbökun nasista á norrænu eðli. Sinfónían skiptist í fimm hluta sem lýsa persónum úr Íslendingasögum: Skarphéðni Njálssyni, Guðrúnu Ósvífursdóttur, Gretti Ásmundarsyni og fleiri köppum.

Ungir einleikarar

Mon, 24 Aug 2009 01:02:00 +0000

Sigurvegarar úr einleikarakeppni Sinfóníuhljómsveitarinnar og Listaháskóla Íslands koma fram á þessum tónleikum sem alla jafna eru einhverjir þeir skemmtilegustu á árinu.

Aðventutónleikar

Mon, 24 Aug 2009 00:56:00 +0000

Fátt er betur til þess fallið en hátíðleg tónlist til að koma manni í jólaskap. Á aðventutónleikum SÍ hljómar hátíðleg jólatónlist frá ýmsum tímum í flutningi tveggja af okkar fremstu söngvurum. Bach, Handel, Corelli, Mozart, Adolphe Adam og Sigvaldi Kaldalóns eiga allir sinn skerf á þessari hátíðlegu og jólalegu efnisskrá.

Heyrðu mig nú!

Mon, 24 Aug 2009 00:53:00 +0000

Þótt hið hefðbundna tónleikaform standi ávallt fyrir sínu er hollt og gott að breyta til og reyna aðrar leiðir til að gefa hlustendum innsýn í heim sígildrar tónlistar. Í tónleikum undir merkinu Heyrðu mig nú! er tónlistin kynnt á nýstárlegan og aðgengilegan hátt.

Kvikmyndatónlist John Williams

Mon, 24 Aug 2009 00:49:00 +0000

John Williams hefur samið tónlist við fleiri ódauðlegar bíómyndir en nokkur annar fyrr eða síðar. Hann hefur verið tilnefndur til 45 Óskarsverðlauna sem eru fleiri tilnefningar en nokkur annar hefur hlotið, að Walt Disney undanskildum.

Ungsveit SÍ

Sun, 23 Aug 2009 20:44:00 +0000

Fátt er ánægjulegra en að heyra ungt fólk í blóma lífsins stilla saman strengi sína í orðsins fyllstu merkingu og leyfa öllu litrófi tilfinninganna að skína. Nú hefur Sinfóníuhljómsveit Íslands ákveðið að halda námskeið í hljómsveitarleik fyrir tónlistarnema og eru miklar vonir bundnar við að slík námskeið verði fastur liður í starfsemi hljómsveitarinnar.

Upphafstónleikar - Ashkenazy feðgar

Sun, 23 Aug 2009 20:37:00 +0000

Það er ávallt stórviðburður í íslensku tónlistarlífi þegar Vladimir Ashkenazy stjórnar Sinfóníuhljómsveit Íslands. Það er ekki síður gleðiefni að einleikari á upphafstónleikum SÍ skuli vera Vovka sonur hans, sem hefur getið sér frábært orð fyrir píanóleik sinn víða um heim.

Maxímús Músíkús trítlar í tónlistarskólann

Wed, 19 Aug 2009 23:38:00 +0000

Í sögunni Maxímús Músíkús trítlar í tónlistarskólann kynnist Maxí börnum sem leika á alls kyns hljóðfæri. Í hverju horni tónlistarskólans er verið að æfa og börnin eru öll afar spennt og kát því að þau eiga að fá að koma fram með stóru sinfóníuhljómsveitinni.

Heimsókn í dýragarðinn

Wed, 19 Aug 2009 23:34:00 +0000

Öllum krökkum finnst gaman að fara í dýragarðinn og nú breytum við Háskólabíói í einn slíkan. Örn Árnason leiðir okkur í gegnum töfraheim dýranna, fyrst með völdum köflum úr hinu bráðskemmtilega Karnvali dýranna eftir Saint-Saëns.

Ævintýrið um Eldfuglinn

Wed, 19 Aug 2009 23:25:00 +0000

Í Rússlandi býr ungur prins sem heitir Ívan. Hann verður ástfanginn af fallegri prinsessu en hún er í haldi Kasteis, sem er ógurlegt skrímsli. Ívan ákveður að stefna lífi sínu í voða til að bjarga ástinni sinni frá glötun og með hjálp göldrótta eldfuglsins tekst honum að vinna bug á Kastei hinum illa.

Rumon kveður

Wed, 19 Aug 2009 23:07:00 +0000

Rumon Gamba hefur gegnt stöðu aðalhljómsveitarstjóra SÍ í átta ár en nú skilur leiðir og hann tekur við fastri stöðu við Norrbotten Opera í Svíþjóð á komandi hausti. Rumon kaus að láta efnisskrá kveðjutónleikana endurspegla áherslur sínar í starfinu og valdi verk eftir enskt, íslenskt og rússneskt tónskáld.

Rússnesk rómantík

Wed, 19 Aug 2009 23:03:00 +0000

Kalevi Aho er eitt af fremstu nútímatónskáldum Finna. Verk hans eru yfirleitt stór í sniðum og einkennast af dramatík og sálrænni spennu, með greinilegum áhrifum frá Mahler og Sjostakovitsj.

Víkingur spilar Chopin

Wed, 19 Aug 2009 22:58:00 +0000

Nokkrum dögum fyrir 200 ára afmæli Chopins heldur SÍ afmælisveislu sem verður lengi í minnum höfð. Það er óþarfi að kynna Víking Heiðar Ólafsson fyrir íslenskum tónleikagestum enda hefur hann löngum spilað sig inn í hug og hjörtu landsmanna með einlægri og glæsilegri túlkun sinni.

20. aldar klassík

Wed, 19 Aug 2009 22:53:00 +0000

Fáir ungir tónlistarmenn hafa verið jafn hlaðnir lofi á undanförnum árum og hin tuttugu og eins árs gamla Lise de la Salle. Hún sameinar tæknilega kunnáttu og djúpa ástríðu á einstakan hátt í flutningi sínum og þar sem hún heldur að jafnaði aðeins 20 tónleika á ári er það stórviðburður í hvert sinn sem hún kemur fram.

Chopin & Beethoven

Wed, 19 Aug 2009 22:48:00 +0000

Í tilefni þess að 200 ár eru liðin frá fæðingu Chopins leikur Sinfóníuhljómsveit Íslands báða píanókonserta meistarans með ungum íslenskum píanistum. Það er Ástríður Alda Sigurðardóttir sem ríður á vaðið og flytur hinn undurfagra og tregafulla píanókonsert nr. 2

Sólskinssinfónían

Wed, 19 Aug 2009 22:34:00 +0000

Eivind Aadland hefur stjórnað Sinfóníuhljómsveit Íslands tvisvar sinnum áður og hlotið frábærar viðtökur í bæði skiptin. Hann lærði hjá meisturunum Yehudi Mehuhin og Jorma Panula og nýtur mikillar virðingar í starfi sínu sem aðalstjórnandi Sinfóníuhljómsveitarinnar í Þrándheimi. Stefán Jón Bernharðsson leikur með Sinfóníuhljómsveit Íslands en var áður sóló-hornleikari við Óperuna í Malmö.

Schumann & Brahms II

Wed, 19 Aug 2009 22:20:00 +0000

Er mögulegt að semja heila sinfóníu á fjórum dögum? Það afrekaði Robert Schumann í janúar 1841 þegar hann var á hátindi ferils síns. Einkalífið blómstraði, hann hafði fengið að kvænast sinni heittelskuðu Clöru eftir áralangt stríð við tengdaföður sinn og nú logaði „sinfónískur eldur“ í brjósti hans, eins og hann orðaði það sjálfur.

Dafnis og Klói

Wed, 19 Aug 2009 22:16:00 +0000

Það eru nærri þrjátíu ár síðan kór úr Menntaskólanum við Hamrahlíð tók þátt í fyrsta heildarflutningi á Dafnis og Klói á Íslandi, með SÍ undir stjórn Jean-Pierre Jacquillat. Tónleikarnir gengu eins og í sögu, hljómsveit og kór var hrósað í hástert og samdóma álit manna að sjaldan hefði heyrst annað eins á tónleikum á Íslandi.

Hilary spilar Prokofíev

Wed, 19 Aug 2009 22:10:00 +0000

Þótt Hilary Hahn sé ung að árum hefur hún verið meðal fremstu fiðluleikara heims í meira en áratug. Hún lauk námi við Curtistónlistarháskólann 16 ára gömul og var þá þegar farin að koma fram með hljómsveitum austan hafs og vestan. Hún er á föstum samningi hjá Deutsche Grammophon, hlaut Grammy-verðlaunin í flokki einleikskonserta á síðasta ári auk þess sem Gramophone valdi hana tónlistarmann ársins.

Tónar úr nýja heiminum

Wed, 19 Aug 2009 22:00:00 +0000

Í áranna rás hafa fjölmörg tónskáld ferðast frá Evrópu til Bandaríkjanna og dvalið þar um lengri eða skemmri tíma. Dvorák sigldi til New York til að taka við skólastjórastöðu en Bartók og Stravinskíj til að flýja ógnarstjórn nasista á fjórða áratug 20. aldar. Verkin á þessari efnisskrá eiga það sameiginlegt að vera öll samin í Vesturheimi en þó eru þau eins ólík og hugsast getur.

Schumann & Brahms I

Wed, 19 Aug 2009 21:55:00 +0000

Milli tónskáldanna Roberts Schumann og Johannesar Brahms ríkti djúp vinátta þótt kynni þeirra yrðu því miður ekki langvinn. Í tilefni þess að 8. júní 2010 eru 200 ár liðin frá fæðingu Schumanns efnir SÍ til Schumann/Brahms-veislu sem mun standa fram á vor 2011, með tónleikum þar sem leiknar verða sinfóníur þeirra og einleikskonsertar fyrir ýmis hljóðfæri.

Ásdís og Eldfuglinn

Wed, 19 Aug 2009 21:48:00 +0000

Ásdís Valdimarsdóttir er ein þeirra Íslendinga sem hafa náð hvað lengst í tónlist á alþjóðlegum vettvangi. Hún lærði við Juilliard-tónlistarskólann og var víóluleikari Chilingirian-kvartettsins um árabil, auk þess sem hún hefur komið fram með mörgum helstu tónlistarmönnum heims.

Árstíðirnar fjórar í Langholtskirkju

Wed, 19 Aug 2009 21:29:00 +0000

Það er leitun að tónverki sem nýtur meiri hylli en yndislegur óður Antonios Vivaldi til náttúrunnar og lífsins, Árstíðirnar fjórar. Argentínski tangósnillingurinn Astor Piazzolla var svo innblásinn af Árstíðum Vivaldis að hann samdi sínar eigin.

Carmina Burana

Wed, 19 Aug 2009 21:23:00 +0000

Líklega hefur ekkert klassískt verk frá 20.öld notið þvílíkra vinsælda og Carmina Burana eftir Carl Orff. Nafnið kemur úr handriti sem hefur að geyma trúar-, ástar- og drykkjusöngva frá 12. og 13. öld. Orff samdi hið magnaða verk sitt árið 1936 og það hefur haldið nafni hans á lofti æ síðan.

Vínartónleikar

Wed, 19 Aug 2009 21:15:00 +0000

Vínartónleikar Sinfóníunnar eru ávallt einstök upplifun enda hafa þeir um árabil slegið öllum öðrum tónleikum sveitarinnar við í vinsældum. Efnisskráin er ólík á hverju ári en uppbyggingin er ávallt sú sama og í þetta sinn er þar að finna fjölmarga gullmola, meðal annars Dónárvalsinn sem allir þekkja.

Uppáhalds rómantík

Fri, 14 Aug 2009 13:52:00 +0000

Lettneska sópransöngkonan Inessa Galante hefur átt glæstan feril við mörg helstu óperuhús Evrópu og syngur nú með Sinfóníuhljómsveit Íslands í fyrsta sinn.

Eftirlætis Mozart

Fri, 14 Aug 2009 13:43:00 +0000

Sænski klarínettusnillingurinn Martin Fröst er staðarlistamaður Sinfóníuhljómsveitar Íslands starfsárið 2009-10. Hann hefur fyrir löngu skipað sér í hóp fremstu tónlistarmanna Norðurlanda, hefur hlotið ótal verðlaun og komið fram í virtustu tónleikasölum heims.