Tónskáldastofa Sinfóníunnar

Spennandi vettvangur fyrir íslensk tónskáld

Föstudaginn 27. janúar 2012 efnir SÍ í annað sinn til svokallaðrar Tónskáldastofu, þar sem valin verða til þátttöku þrjú hljómsveitarverk eftir tónskáld undir 35 ára aldri. Hljómsveitin mun leika verkin undir stjórn Ilans Volkov, og í kjölfarið fá tónskáldin athugasemdir og leiðbeiningar frá hljómsveitarmeðlimum, stjórnanda, og tónskáldinu Hans Abrahamsen sem einnig verður viðstaddur. Með þessu framtaki vonast SÍ til að taka virkari þátt en áður í uppeldi íslenskra hljómsveitartónskálda í fremstu röð.

Skilafrestur tónverka í Tónskáldastofuna er föstudagurinn 23. september 2011, klukkan 12 á hádegi. Verkin skulu ekki vera lengri en 15 mínútur og fjöldi flytjenda skal ekki vera meiri en sem nemur hefðbundinni stærð Sinfóníuhljómsveitar Íslands (sjá nánar í reglum keppninnar hér að neðan). Verkin skulu merkt með dulnefni og skal umslag með nafni höfundar, merkt dulnefninu, fylgja hverju innsendu verki.

Tónverkin skulu berast:
Sinfóníuhljómsveit Íslands
- Tónskáldastofa
Hörpu
Austurbakka 2
101 Reykjavík

Reglur:
 
1. Miðað er við að tónverkið sé ekki lengra en 15 mínútur að lengd.
 
2. Tónverkið skal samið fyrir sinfóníuhljómsveit, að hámarki eftirfarandi stærð:
3.3.3.3. 4.3.3.1
3slv + pákur
píanó/selesta
harpa
strengir að hámarki 14.12.10.8.6.
 

4. Umsóknin skal samanstanda af:
a) einni raddskrá sem einungis skal merkt með dulnefni. Nafn höfundar komi hvergi fram á raddskránni.
b) einu lokuðu umslagi, merktu dulnefninu, sem inniheldur nafn höfundar, símanúmer og netfang.  
 
5. Umsóknum skal skila á skrifstofu Sinfóníuhljómsveitar Íslands, Hörpu, Austurbakka 2, 101 Reykjavík, í síðasta lagi klukkan 12 á hádegi föstudaginn 23. september 2011, merkt „Tónskáldastofa“. Verk sem ekki hafa borist fyrir tilskilinn skilafrest eru ekki gjaldgeng í keppnina.
 
6. Dómnefnd er skipuð aðalstjórnanda SÍ, tónlistarstjóra SÍ, og fulltrúa verkefnavalsnefndar SÍ. Ekki er hægt að áfrýja niðurstöðu dómnefndar.
 
7. Úrslit dómnefndar verða kunngerð í byrjun október 2011 og verður öllum þátttakendum tilkynnt um úrslitin með tölvupósti.
 
8. Þeir sem valdir eru til þátttöku í Tónskáldastofunni skuldbinda sig til að skila öllum hljóðfæraröddum fullfrágengnum til skrifstofu SÍ eigi síðar en 5. desember 2011.
 
9. Þeir sem valdir eru til þátttöku í Tónskáldastofunni skuldbinda sig til að vera viðstaddir Tónskáldastofuna í Eldborg, Hörpu, föstudaginn 27. janúar frá kl. 10:00-13:00.

Helstu dagsetningar:
föstudagur 23. september 2011 - Skilafrestur á raddskrám í keppni, kl. 12 á hádegi
október 2011   - Tilkynnt um þátttakendur
mánudagur 5. desember 2011 - Skil á hljóðfæraröddum til SÍ
föstudagur 27. janúar 2012 - Tónskáldastofa í Hörpu, kl. 10:00-13:00