Ævintýratónleikar Ævars

Ævar Þór vísindamaður, leikari og rithöfundur sló eftirminnilega í gegn á tónleikum með Sinfóníuhljómsveit Íslands fyrir tveimur árum. Nú er hann mættur aftur með spennuþrungin ævintýri í farteskinu. Ævar og Sinfóníuhljómsveitin fara um víðan völl og með forvitnina að vopni kynnir hann fyrir hlustendum ævintýralegustu tónverkin sem hann þekkir. Þess á milli á milli segir Ævar nokkur af uppáhalds ævintýrunum sínum.

Á tónleikunum verður meðal annars flutt tónlist úr Harry Potter-myndunum, Sjóræningjum Karíbahafsins, Hringadróttinssögu og Draugabönum ásamt glænýju íslensku tónverki sem var unnið upp úr verðlaunabókinni Þín eigin þjóðsaga.

Ekki missa af þessum æsispennandi ævintýratónleikum þar sem hlustandinn veit ekki hvers má vænta handan hornsins. 

Tónleikarnir kl. 16:00 eru túlkaðir á táknmáli í tilefni af degi íslenska táknmálsins sem er 11. febrúar. Táknmálstúlkur er Eyrún Helga Aradóttir.