Alina spilar Sibelius

Rússneski fiðluleikarinn Alina Pogostkina er fædd í Leníngrad og hóf fiðlunám fjögurra ára gömul, en fjölskylda hennar fluttist síðar til Þýskalands og hún stundaði framhaldsnám í Berlín og Salzburg. Hún hlaut fyrstu verðlaun í Sibelius-keppninni í Helsinki árið 2005 og hefur síðan komið fram með mörgum helstu hljómsveitum og stjórnendum heims, m.a. Gustavo Dudamel, Sakari Oramo og Vladimir Ashkenazy, auk þess að koma fram á tónlistarhátíðunum í Salzburg, Edinborg og Bergen. Fiðlukonsert Sibeliusar er sívinsælt meistaraverk og þessi sigurvegari Sibeliusar-keppninnar hefur fengið lof víða um lönd fyrir túlkun sína á einmitt þessu verki. Alina Pogostkina leikur á Stradivarius-fiðlu frá árinu 1717 sem hún hefur að láni frá Nippon Music Foundation.

Daniel Blendulf er margverðlaunaður sænskur hljómsveitarstjóri og er aðalstjórnandi Dalasinfoniettan. Hann stjórnar stemningsríku verki Kaiju Saariaho þar sem hún sækir innblástur í norrænan vetrarhiminn. Konsert fyrir hljómsveit var eitt síðasta verkið sem ungverski meistarinn Béla Bartók lauk við áður en hann lést úr hvítblæði árið 1945. Í konsertinum sýnir hann allar hliðar hljómsveitarinnar á glæsilegan hátt enda hefur þetta verið eitt af vinsælustu hljómsveitarverkum 20. aldar allt frá því það hljómaði fyrst.

Fiðluleikarinn Alina Pogostkina hleypur í skarðið fyrir Janine Jansen sem hefur neyðst til að aflýsa öllum tónleikum sínum undanfarnar vikur vegna veikinda.