Ungsveit SÍ
Fátt er ánægjulegra en að heyra ungt fólk í blóma lífsins stilla saman strengi sína í orðsins fyllstu merkingu og leyfa öllu litrófi tilfinninganna að skína. Nú hefur Sinfóníuhljómsveit Íslands ákveðið að halda námskeið í hljómsveitarleik fyrir tónlistarnema og eru miklar vonir bundnar við að slík námskeið verði fastur liður í starfsemi hljómsveitarinnar. Margoft hefur verið sýnt fram á að tónlistariðkun er sterkt afl í uppeldi og menntun ungs fólks og nokkrar æskulýðshljómsveitir hafa náð heimsfrægð á síðustu misserum, til dæmis Simon Bolivarhljómsveitin í Venesúela undir stjórn Gustavos Dudamel sem og hljómsveit araba og gyðinga sem Daniel Barenboim hefur leitt með miklum myndarbrag. Á fyrstu tónleikum Ungsveitar SÍ verður leikin hin magnþrungna fimmta sinfónía Sjostakovitsj sem er eitt áhrifamesta andóf sem um getur í tónlistarsögu 20. aldarinnar. Hún var samin skömmu eftir að Jósef Stalín hafði lýst yfir vanþóknun sinni á tónlist Sjostakovitsj og ferill hans var í mikilli hættu. Sjálft sagði tónskáldið um lokataktana þar sem slagverkið dynur af fullum þunga: „Það er eins og einhver berji þig með kylfu og segi: „Þú átt að fagna, þú átt að fagna“ og þú stendur skjálfandi á fætur og gengur burt muldrandi „Ég á að fagna, ég á að fagna“. Hvers konar sigur er það?“
-
Stjórnandi
Rumon Gamba
-
Hljómsveit
Ungsveit SÍ
-
Efnisskrá
Dimítríj Sjostakovitsj: Sinfónía nr. 5
