Vínartónleikar
Vínartónleikar Sinfóníunnar eru ávallt einstök upplifun enda hafa þeir um árabil slegið öllum öðrum tónleikum sveitarinnar við í vinsældum. Efnisskráin er ólík á hverju ári en uppbyggingin er ávallt sú sama og í þetta sinn er þar að finna fjölmarga gullmola, meðal annars Dónárvalsinn sem allir þekkja. Á hverju ári eru líka tekin nokkur aukalög og endað á Radetzky-marsinum víðfræga við taktfast klapp áheyrenda.
Finnur Bjarnason hefur lengi verið meðal okkar fremstu tenórsöngvara og hefur m.a. verið fastráðinn við Komische Oper í Berlín, sungið á Glyndebourne-hátíðinni í Englandi og hlaut mikið lof fyrir söng sinn í Brottnáminu úr kvennabúrinu í Íslensku óperunni.
Þóra Einarsdóttir stundaði söngnám við Söngskólann í Reykjavík hjá Ólöfu Kolbrúnu Harðardóttur og við Guildhall School of Music and Drama hjá Prof. Lauru Sarti. Þóra þreytti frumraun sína að námi loknu við Glyndebourne Festival Opera árið 1995. Hún steig þó fyrst á svið Íslensku óperunnar aðeins 18 ára gömul í litlum hlutverkum í Rigoletto og í Töfraflautunni.
Þóra söng hlutverk Önnu Frank í óperunni Dagbók Önnu Frank eftir Grigori Frid í Íslensku óperunni á Listahátíð 2008 og í óperu Sunleif Rasmussen Í óðsmannsgarði á listahátíð 2009. Framundan eru m.a gestasamningar við óperuhús í Genf, London og í Austurríki.
-
Stjórnandi
Christopher Warren-Green
-
Einsöngvarar
Þóra Einarsdóttir
Finnur Bjarnason -
Efnisskrá
Vínartónlist: Johann Strauss yngri, Franz Lehár og fleiri
