Víkingur spilar Chopin

Nokkrum dögum fyrir 200 ára afmæli Chopins heldur SÍ afmælisveislu sem verður lengi í minnum höfð.

Það er óþarfi að kynna Víking Heiðar Ólafsson fyrir íslenskum tónleikagestum enda hefur hann löngum spilað sig inn í hug og hjörtu landsmanna með einlægri og glæsilegri túlkun sinni. Hann frumflutti píanókonsert Daníels Bjarnasonar með hljómsveitinni á síðasta starfsári og fögnuðurinn í lokin var slíkur að húsið lék á reiðiskjálfi.

Hann leikur nú fyrri píanókonsert Chopins í fyrsta sinn á tónleikum og á eflaust eftir að snerta marga strengi í hjörtum áheyrenda með leik sínum.

Sjöunda sinfónía Antons Bruckners er ekki síst kunn fyrir ægifagran hægan þátt sem tónskáldið samdi í minningu Richard Wagners. Sinfóníur Bruckners eru voldugar og þykja oft minna á dómkirkjur í tónum og svo er einnig hér.

Hljómur Sinfóníuhljómsveitar Íslands fær svo sannarlega notið sín í hinum mögnuðu tónahvelfingum austurríska meistarans og þeir sem hafa gaman af rómantískri hljómsveitartónlist ættu ekki að missa af þessari einstöku tónsmíð.

Finnski hljómsveitarstjórinn Pietari Inkinen er aðalstjórnandi Sinfóníuhljómsveitar Nýja-Sjálands og aðalgestastjórnandi Fílharmóníuhljómsveitarinnar í Japan. Hann þykir sérlega áhugaverður stjórnandi og hefur þegar stjórnað fjölda alþjóðlegra hljómsveita, m.a. Gewandhaus-hljómsveitinni í Leipzig, Staatskapelle Dresden, Fílharmóníuhljómsveit BBC og Fílharmóníuhljómsveitinni í Ísrael.

Sækja efnisskrá

Munið Vinafélagskynninguna í Neskirkju

Súpa og spjall Árna Heimis Ingólfssonar um verkin á tónleikunum á Kaffitorginu í Neskirkju kl. 18. Allir velkomnir.