Mahler og Strauss
Söngvarnir sem Richard Strauss samdi ári fyrir dauða sinn eru einhverjir þeir fegurstu sem settir hafa verið á blað, enda urðu þeir strax sígildir í bestu merkingu orðsins. Hér fléttar tónskáldið saman söng og hljóðfæra leik með áhrifamiklum hætti. Tónlistin hefur enda hljómað víða um heim og verið notuð í kvikmyndir, meðal annars í Óskarsverðlaunamyndina The Hours.
Á því leikur enginn vafi að Gustav Mahler var eitt merkasta sinfóníuskáld allra tíma. Í meðförum hans varð sinfónían risavaxinn heimur þar sem ólíkir heimar mætast. Fyrsta sinfónía hans er magnþrungið tónverk þar sem risastór sinfóníuhljómsveit fer á kostum, með kraftmiklum lúðraþyt í bland við ljúfa sveitadansa, auk þess sem Meistari Jakob skýtur upp kollinum þegar síst skyldi.
Lionel Bringuier var aðeins nítján ára þegar hann hreppti fyrstu verðlaun í Besançonhljómsveitarstjórakeppninni árið 2005. Nú er hann orðinn einn eftirsóttasti ungi stjórnandi heims og hefur meðal annars stýrt fílharmóníuhljómsveitunum í New York og Los Angeles. Hann debúteraði á Mostly Mozarthátíðinni í júlí 2010 og það verður spennandi að sjá hvernig stórbrotin sinfónía Mahlers hljómar í meðförum hans.
Emma Bell er ein glæsilegasta sópransöngkona Bretlands um þessar mundir og hefur sungið við Metropolitan, Covent Garden og Glyndebourne-óperuhúsin við frábærar undirtektir. Hún fékk standandi lófatak að launum þegar hún kom fram með sinfóníunni í júní 2009 og nú snýr þessi hrífandi listakona aftur og flytur eitt af meistaverkum sinfónískrar söngtónlistar.
-
Stjórnandi
Lionel Bringuier
-
Einleikari
Emma Bell
-
Efnisskrá
Richard Strauss: Fjórir síðustu söngvar
Gustav M ahler: Sinfónía nr. 1
