Sigurvegarar úr einleikarakeppni Sinfóníuhljómsveitarinnar og Listaháskóla Íslands koma fram á þessum tónleikum sem alla jafna eru einhverjir þeir skemmtilegustu á árinu. Það er sannkallað gleðiefni hversu margir efnilegir tónlistarmenn leynast í skólum landsins og ávallt stór stund þegar nokkrir þeirra fá að stíga á svið með hljómsveitinni. Á þessum tónleikum ríkir ávallt sérstök spenna, eftirvænting og stolt yfir þeim mikla mannauði sem íslensk þjóð býr yfir.

Kvikmyndatónleikar Sinfóníunnar á síðasta starfsári voru frábærlega sóttir og yfir 400.000 manns hafa séð myndskeið á YouTube þar sem Svarthöfði stjórnar tónlist úr Stjörnustríði. Nú endurtökum við leikinn með tónlist úr öðrum frægum kvikmyndum. Meðal annars verður flutt hljómsveitarsvíta úr Psycho eftir Bernard Herrmann, þættir úr Cinema Paradiso eftir Ennio Morricone og Guðföðurnum eftir Nino Rota. Auk þess verður flutt tónverkið Popcorn Superhet Receiver eftir Jonny Greenwood úr Radiohead, sem hefur látið töluvert að sér kveða sem tónskáld á síðustu árum. Þetta tónverk hljómaði í Óskarsverðlaunamyndinni There Will Be Blood frá árinu 2007.

Á Myrkum músíkdögum verður fjölbreytt efnisskrá að vanda. Daníel Bjarnason stjórnar tónleikunum og semur auk þess

nýtt hljómsveitarverk, en þess er skemmst að minnast þegar Víkingur Heiðar frumflutti píanókonsert hans á Myrkum músíkdögum 2009 við feykigóðar undirtektir. Daníel hefur vakið mikla og verðskuldaða athygli að undanförnu; hann var tilnefndur til Norrænu tónskáldaverðlaunanna fyrir verkið Bow to String, og hlaut Íslensku tónlistarverðlaunin 2010, bæði fyrir tónverk ársins og sem höfundur ársins.