• 27.1.2011 19:30
• Háskólabíó
• 3.900 kr. / 3.400 kr.
• Kaupa miða

Myrkir músíkdagar

Á Myrkum músíkdögum verður fjölbreytt efnisskrá að vanda. Daníel Bjarnason stjórnar tónleikunum og semur auk þess

nýtt hljómsveitarverk, en þess er skemmst að minnast þegar Víkingur Heiðar frumflutti píanókonsert hans á Myrkum músíkdögum 2009 við feykigóðar undirtektir. Daníel hefur vakið mikla og verðskuldaða athygli að undanförnu; hann var tilnefndur til Norrænu tónskáldaverðlaunanna fyrir verkið Bow to String, og hlaut Íslensku tónlistarverðlaunin 2010, bæði fyrir tónverk ársins og sem höfundur ársins.

Tveir nýir íslenskir konsertar hljóma á tónleikunum. Finnur Torfi Stefánsson, sem m.a. komst í úrslit Masterprize-tónsmíðakeppni Breska ríkisútvarpsins árið 2001, hefur samið fiðlukonsert handa Sigrúnu Eðvaldsdóttur sem nú hljómar í fyrsta sinn. Íslensk-þýska tónskáldið Steingrímur Rohloff lærði tónsmíðar í Köln og París, og hefur hlotið ýmis verðlaun fyrir verk sín, meðal annars þýsku Bernd Alois Zimmermann-verðlaunin fyrir „melódíska andagift og glæsilega notkun hljómsveitarinnar“.

Atmosphères eftir György Ligeti er löngu orðið eitt af sígildu hljómsveitarverkum 20. aldarinnar. Ekki spillti heldur fyrir þegar Stanley Kubrick notaði það í mynd sína 2001: A Space Odyssey, að sögn af því hann hreifst af tímaleysinu sem verkið gefur í skyn. Verkið er heillandi hljóðmúr, settur saman af ótal tónum sem hljóma á sama tíma og gefa því sérkennilegan, dulúðugan og hrífandi blæ.

Senda