Myrkir músíkdagar
Nýtt, ferskt og spennandi
Á Myrkum músíkdögum hljóma íslensk verk í bland við erlenda samtímatónlist eftir nokkur af athyglisverðustu tónskáldum samtímans. Iannis Xenakis var eitt af stóru tónskáldunum á síðari hluta 20. aldar. Metastasis var fyrsta stjóra hljómsveitarverk hans sem vakti verulega athygli, samið 1954 eftir að hann hafði numið um skeið hjá Messiaen. Hljómsveitin samanstendur af 61 hljóðfæri sem hvert leikur sína eigin sjálfstæðu rödd, svo að allt rennur saman í mikilfenglegan hljóðmassa.
Hymnos, eða Sálmur, er eitt einfaldasta og áheyrilegasta verk ítalska meistarans Giacinto Scelsi, fyrir stóra hljómsveit sem skipt er upp í tvo hópa sem leika hvor á móti öðrum.
Danska tónskáldið Hans Abrahamsen hefur hlotið fjölda viðurkenninga fyrir tónlist sína. Hann lærði m.a. hjá Györgi Ligeti og Per Nørgård og verk hans hafa verið flutt m.a. á Proms-hátíðinni í Lundúnum. Abrahamsen hlaut Wilhelm Hansen-tónskáldaverðlaunin 1995. Hann er sérstakur gestur Sinfóníuhljómsveitarinnar á þessum tónleikum og er nýja hljómsveitarverk hans, 10 sinfóníur, samið að hluta fyrir Sinfóníuhljómsveit Íslands.
Meðal fyrrum nemenda Abrahamsen í Kaupmannahöfn er Hugi Guðmundsson, sem lauk meistaraprófi þaðan vorið 2005 og stundaði einnig framhaldsnám í elektróník í Hollandi. Hugi hefur starfað með fjölda viðurkenndra flytjenda og tónlistarhópa, og hlaut Íslensku tónlistarverðlaunin 2008 fyrir verk sitt, Apocrypha, og tvö verka hans hafa hlotið sérstaka viðurkenningu á Alþjóðlega tónskáldaþinginu.
-
Stjórnandi
Ilan Volkov
-
Efnisskrá
Giacinto Scelsi: Hymnos
Hugi Guðmundsson: Orkestur
Atli Ingólfsson: Mani
Iannis Xenakis: Metastasis
Hans Abrahamsen: 10 sinfóníur
