Inessa Galante

Lettneska sópransöngkonan Inessa Galante hóf nám við Tónlistarháskólann í Riga árið 1977 og hlaut snemma mikla athygli fyrir list sína. Hún var ráðin við Kirov-óperuna í St. Pétursborg og fékk tækifæri til að syngja vestan járntjaldsins.

Þar heyrðu í henni m.a. þeir Yehudi Menuhin og Zubin Mehta, sem hvöttu hana til að reyna fyrir sér í Bandaríkjunum. Það var ekki fyrr en Sovétríkin hrundu sem hún fluttist til Þýskalands, söng inn á geisladiska og náði miklum vinsældum.

Hún hefur komið fram í Covent Garden, verið fastráðin við óperuhús í Þýskalandi og ferðast nú um heiminn og heldur tónleika við mikinn fögnuð áheyrenda.