Ingibjörg Guðjónsdóttir

Ingibjörg Guðjónsdóttir hóf söngnám hjá Snæbjörgu Snæbjarnardóttur við Tónlistarskóla Garðabæjar og lauk BM-námi við Indiana-háskóla. Hún sótti einnig einkatíma hjá rúmensku söngkonunni Ileana Cotrubas. Ingibjörg hefur komið fram víða í Evrópu og Bandaríkjunum.

Hún var búsett í Danmörku frá 1995-1999 og stofnaði þar íslenskan kvennakór auk þess sem hún kom fram sem einsöngvari. Hún er nú kennari við Tónlistarskólann á Álftanesi og stjórnar Kvennakór Garðabæjar, sem hún stofnaði árið 2000, og Stúlknakór Garðabæjar, sem hún stofnaði 2006.

Árið 2005 kom út geisladiskur þar sem Ingibjörg syngur óperuaríur með Sinfóníuhljómsveit Íslands undir stjórn Gerrits Schuil.