Pietari Inkinen

Finnski hljómsveitarstjórinn Pietari Inkinen er aðalstjórnandi Sinfóníuhljómsveitar Nýja-Sjálands og aðalgestastjórnandi Fílharmóníuhljómsveitarinnar í Japan. Hann þykir sérlega áhugaverður stjórnandi og hefur þegar stjórnað fjölda alþjóðlegra hljómsveita, m.a. Gewandhaus-hljómsveitinni í Leipzig, Staatskapelle Dresden, Fílharmóníuhljómsveit BBC og Fílharmóníuhljómsveitinni í Ísrael.

Í fyrra debúteraði hann m.a. á La Scala í Mílanó og með Concertgebouw-hljómsveitinni í Amsterdam, auk þess að koma fram með Birmingham-hljómsveitinni á Englandi. Hann hefur auk þess stjórnað allnokkrum uppfærslum við Finnsku þjóðaróperuna, hljóðritað geisladiska fyrir Naxos, og komið fram með einleikurum á borð við Vadim Repin og Hilary Hahn.

Inkinen er afburða fiðluleikari og nam við Tónlistarháskólann í Köln undir leiðsögn Zakhars Bron. Hann hefur leikið einleik með fjölmörgum hljómsveitum á Norðurlöndum og leikur á Bergonzi-fiðlu frá árinu 1732.