Sinfóníuhljómsveit Íslands - Listamenn 09/10

Sigrún Hjálmtýsdóttir

Wed, 26 Aug 2009 00:59:41 +0000

Sigrún Hjálmtýsdóttir sópran nam söng hér heima og við Guildhall School of Music and Drama í London. Þaðan lauk hún prófum í einsöng og kennslufræðum og fór síðan í framhaldsnám á Ítalíu. Á námsferli sínum vann hún til fjölda viðurkenninga og verðlauna.

Justin Brown

Wed, 26 Aug 2009 00:58:24 +0000

Breski hljómsveitarstjórinn Justin Brown hefur verið aðalstjórnandi Sinfóníuhljómsveitarinnar í Alabama síðan 2006, og aðalstjórnandi við Badisches Staatstheater í Karlsruhe frá árinu 2008. Hann nam við háskólann í Cambridge og í Tanglewood hjá Seiji Osawa og Leonard Bernstein.

Kristin Sigmundsson

Wed, 26 Aug 2009 00:57:29 +0000

Óþarfi er að kynna Kristin Sigmundsson fyrir Íslendingum, en hann er einn af okkar fremstu söngvurum og nýtur virðingar fyrir list sína um allan heim. Hann lagði stund á líffræði við Háskóla Íslands og stundaði kennslu um árabil, en lærði einnig söng við Söngskólann í Reykjavík og í Vínarborg og Washington, D.C., hjá Helene Karusso, Christian Möller, Wolfgang Gabriel og John Bullock.

Christine Brewer

Wed, 26 Aug 2009 00:56:31 +0000

Bandaríska sópransöngkonan Christine Brewer þykir hafa einstaka rödd, hlýja og skæra, kraftmikla og tjáningarríka. Hún hefur komið fram með öllum helstu stjórnendum og meðleikurum heims. Hún hlaut Grammy-verðlaunin fyrir hljóðritun sína á sönglögum eftir bandaríska tónskáldið William Bolcom.

Jon Kimura Parker

Wed, 26 Aug 2009 00:55:04 +0000

Kanadíski píanóleikarinn Jon Kimura Parker nýtur mikillar virðingar um allan heim fyrir leik sinn. Hann hlaut gullverðlaun í hinni virtu Leeds-píanókeppni og hefur síðan leikið um allan heim, m.a. með Fílharmóníuhljómsveitinni í New York, Cleveland-hljómsveitinni og Philadelphia-hljómsveitinni.

Andrew Litton

Wed, 26 Aug 2009 00:53:50 +0000

Bandaríski hljómsveitarstjórinn gat sér gott orð í tónlistarheiminum sem aðalstjórnandi Sinfóníuhljómsveitarinnar í Dallas, þar sem hann starfaði í tólf ár þar til 2006. Hann fór með hljómsveitina í tónleikaferðir til Evrópu, stjórnaði þeim í Carnegie Hall og á 28 geisladiskum sem fengu afbragðs dóma.

Elfa Rún Kristinsdóttir

Wed, 26 Aug 2009 00:52:32 +0000

Elfa Rún Kristinsdóttir er fædd á Akureyri árið 1985. Hún útskrifaðist af Diplómabraut tónlistardeildar Listaháskóla Íslands vorið 2003 undir handleiðslu Guðnýjar Guðmundsdóttur og Auðar Hafsteinsdóttur. Frá hausti 2003 stundaði Elfa Rún nám við Tónlistarháskólann í Freiburg undir handleiðslu prof. Rainer Kussmaul en hún lauk námi þaðan í febrúar 2007 með hæstu einkunn. Hún býr nú í Berlín.

Wolfram Christ

Wed, 26 Aug 2009 00:50:54 +0000

Wolfram Christ er einn fárra víóluleikara sem hefur getið sér alþjóðlegt orð sem einleikari, en á síðustu árum hefur hann í auknum mæli snúið sér að hljómsveitarstjórn. Hann var aðalstjórnandi Kurpfälzisches Kammerorchester í Mannheim frá 2004-8 og hefur auk þess margoft stjórnað Simon Bolivar-hljómsveitinni í Venesúela, Kammerhljómsveitinni í Basel og Konunglegu hljómsveitinni í Kaupmannahöfn.

Hamrahlíðarkórarnir

Wed, 26 Aug 2009 00:50:13 +0000

Kór Menntaskólans við Hamrahlíð var stofnaður haustið 1967 og hefur Þorgerður Ingólfsdóttir verið stjórnandi hans frá upphafi. Hamrahlíðarkórinn, sem er kór brautskráðra nemenda, hóf starfsemi sína árið 1982. Efnisskrá kóranna er afar fjölbreytt, spannar gamla tónlist og nýja, íslenska og erlenda, og hefur mikill fjöldi íslenskra kórverka verið saminn sérstaklega fyrir kórana og stjórnanda þeirra.

Sarah Connolly

Wed, 26 Aug 2009 00:47:34 +0000

Breska mezzósópran-söngkonan Sarah Connolly nam píanóleik og söng við Royal College of Music í Lundúnum og hefur vakið mikla athygli á síðustu árum fyrir frábæran söng sinn. Hún hefur m.a. sungið Dídó í óperu Purcells við La Scala í Mílanó, Orfeus í óperu Glucks og titilhlutverkið í Lúkresía svívirt við Bæversku þjóðaróperuna í München, titilhlutverkið í Giulio Cesare við Glyndebourne-hátíðina og Annio í La clemenza di Tito við Metropolitan-óperuna í New York. Hún var tilnefnd til Olivier-verðlaunanna fyrir framúrskarandi sína í hlutverki Sestós í La clemenza di Tito við Ensku þjóðaróperuna.

Hillevi Martinpelto

Wed, 26 Aug 2009 00:46:03 +0000

Sænska sópransöngkonan Hillevi Martinpelto debúteraði við Konunglegu óperuna í Stokkhólmi árið 1987 í Madame Butterfly, og fékk fljótlega hlutverk við Drottningholm-óperuna og Norrlands Operan í Umeå. Upp úr 1990 fór hún að syngja við helstu óperuhús heims, m.a. í Berlín, Glyndbourne og Vínarborg, og vakti heimsathygli þegar Sir John Eliot Gardiner tók hana upp á arma sína.

Hilary Hahn

Wed, 26 Aug 2009 00:44:41 +0000

Hin 29 ára gamla Hilary Hahn þykir standa á hátindi frægðar sinnar um þessar mundir en í fyrra hlaut hún bæði Grammy-verðlaun og Gramophone-verðlaun sem einleikari ársins. Hún útskrifaðist úr Curtis-tónlistarháskólanum 16 ára gömul og hefur síðan ferðast um heiminn og haldið hátt í 2000 tónleika. Hún lék m.a. einleik á fiðlu í tónlist kvikmyndarinnar The Village eftir M. Knight Shyamalan, og nýr geisladiskur hennar með fiðlukonserti Sibeliusar fór beint í fyrsta sætið á klassíska Billboard-listanum fyrr á þessu ári.

Benjamin Shwartz

Wed, 26 Aug 2009 00:43:37 +0000

Þótt hann sé enn á þrítugsaldri hefur bandaríski hljómsveitarstjórinn Benjamin Shwartz þegar vakið athygli víða um lönd fyrir hæfileika sína. Hann ólst upp í Los Angeles og Ísrael, og lærði við Curtis-tónlistarháskólann í Fíladelfíu þar sem hann starfaði náið með Christoph Eschenbach.

Víkingur Heiðar Ólafsson

Wed, 26 Aug 2009 00:41:48 +0000

Víkingur Heiðar Ólafsson lauk námi til meistaragráðu frá Juilliard Listaháskólanum vorið 2008 þar sem hann lærði hjá Robert McDonald og Jerome Lowenthal. Hann byrjaði fjögurra ára að leika á píanó og hlaut fyrstu tilsögn frá móður sinni, Svönu Víkingsdóttur og síðar hjá Erlu Stefánsdóttur og Peter Máté. Hann hefur komið fram á fjölda tónleika frá unglingsaldri, m.a. Í Bandaríkjunum, Kína, Kanada, Lettlandi, Rúmeníu, Ítalíu, Belgíu, Spáni og Frakklandi auk þess að leika einleik m.a. með Sinfóníuhljómsveit Íslands, Juilliard Orchestra, New Juilliard Ensemble, Caput og Kammersveit Reykjavíkur.

Pietari Inkinen

Wed, 26 Aug 2009 00:40:22 +0000

Finnski hljómsveitarstjórinn Pietari Inkinen er aðalstjórnandi Sinfóníuhljómsveitar Nýja-Sjálands og aðalgestastjórnandi Fílharmóníuhljómsveitarinnar í Japan. Hann þykir sérlega áhugaverður stjórnandi og hefur þegar stjórnað fjölda alþjóðlegra hljómsveita, m.a. Gewandhaus-hljómsveitinni í Leipzig, Staatskapelle Dresden, Fílharmóníuhljómsveit BBC og Fílharmóníuhljómsveitinni í Ísrael.

Sæunn Þorsteinsdóttir

Wed, 26 Aug 2009 00:36:55 +0000

Sæunn Þorsteinsdóttir fæddist í Reykjavík árið 1984. Hún byrjaði 5 ára gömul að læra á selló hjá Hauki Hannessyni við Tónlistarskóla Íslenska Suzukisambandsins. Er hún var 7 ára fluttist hún til Bandaríkjanna þar sem hún hefur búið að mestu síðan. Sæunn útskrifaðist frá Cleveland Institute of Music árið 2006 með BM-gráðu og hlaut þar verðlaun sem framúrskarandi nemandi bæði í sellóleik og kammertónlist. Þá lá leiðin til Juilliard skólans í New York þar sem aðalkennari hennar var Joel Krosnick og lauk hún meistaragráðu þaðan árið 2008.

Susanna Mälkki

Wed, 26 Aug 2009 00:35:02 +0000

Susanna Mälkki er fædd í Helsinki 1969 og lærði sellóleik hjá Hannu Kiiski á unga aldri. Hún fór síðar í frægan hljómsveitarstjórabekk Jormas Panula við Sibeliusarakademíuna auk þess sem hún lærði hjá Leif Segerstam og við Royal Academy of Music í Lundúnum. Hún hefur einnig sótt meistaranámskeið hjá Esa-Pekka Salonen.

Jón Svavar Jósefsson

Wed, 26 Aug 2009 00:34:01 +0000

Jón Svavar Jósefsson útskrifaðist frá óperudeild Universität für Musik und darstellende Kunst Wien í júní 2007. Hann hefur sótt fjölda námskeiða í söng og sviðslistum á Íslandi, Belgíu og Austurríki. Jón hefur haldið marga einsöngstónleika og komið víða fram, á Íslandi sem og annars staðar.

Mark Tucker

Wed, 26 Aug 2009 00:32:03 +0000

Mark Tucker hefur vakið mikla athygli á undanförnum árum fyrir flutning sinn á tónlist barokk- og klassíska tímans. Hann stundaði tónlistarnám í Cambridge og við Guildhall School of Music and Drama, og debúteraði í London með tónleikum í Purcell Room og Royal Festival Hall árið 1984.

Hallveig Rúnarsdóttir

Wed, 26 Aug 2009 00:30:57 +0000

Hallveig Rúnarsdóttir hóf söngnám hjá Sigurði Demetz árið 1991. Hún lauk 8. stigi frá Tónlistarskólanum í Reykjavík undir handleiðslu Rutar L. Magnússon árið 1998. Það sama ár hóf hún nám hjá Theresu E. Goble við Guildhall School of Music and Drama í London og útskrifaðist þaðan með láði sumarið 2001.

Franck Ollu

Wed, 26 Aug 2009 00:22:10 +0000

Finnski hljómsveitarstjórinn Franck Ollu þykir einstaklega fjölhæfur og hæfileikaríkur stjórnandi, og vakti mikla hrifningu þegar hann stjórnaði Sinfóníuhljómsveit Íslands á Norrænum músíkdögum 2006.

Lise de la Salle

Wed, 26 Aug 2009 00:20:23 +0000

Lise de la Salle er fædd árið 1988 og hélt fyrstu tónleika sína í franska útvarpið níu ára gömul. Hún vann fjölda keppna í Frakklandi og árin 2003 og 2004 skaust hún upp á stjörnuhimininn þegar hún bar sigur úr býtum í European Young Concert Artists-keppninni í París og Young Concert Artists International-keppninni í New York.

Ilan Volkov

Wed, 26 Aug 2009 00:18:00 +0000

Ilan Volkov tók við af Osmo Vänskä sem aðalstjórnandi BBC-sinfóníunnar í Skotlandi í janúar 2003. Hann hefur hlotið mikið lof fyrir gegnsæja túlkun sína á tónlist klassíska og rómantíska tímans, en er sérstakur áhugamaður um flutning nútímatónlistar. Volkov stýrir skosku BBC-hljómsveitinni á yfir 25 tónleikum ár hvert, og hefur ferðast með hljómsveitinni til Spánar, Suður-Ameríku og Eystrasaltsríkjanna.

Hanna Dóra Sturludóttir

Tue, 25 Aug 2009 20:51:45 +0000

Hanna Dóra Sturludóttir stundaði söngnám hjá Kristni Sigmundssyni og Snæbjörgu Snæbjarnar við Söngskólann í Reykjavík áður en hún hélt til framhaldsnáms við Listaháskólann í Berlín, þar sem hún útskrifaðist með láði vorið 1998. Árið 1995 vann hún ljóðasöngkeppnina „Paula Lindberg-Salomon“ í Berlín og hljóðritaði í framhaldi af því tvo geisladiska með ljóðasöngvum frá 20.öld.

Finnur Bjarnason

Tue, 25 Aug 2009 20:50:32 +0000

Finnur Bjarnason tenór stundaði söngnám við Tónskóla Sigursveins í Reykjavík og síðan framhaldsnám við Guildhall School of Music and Drama og National Opera Studio í London.

Christopher Warren-Green

Tue, 25 Aug 2009 20:49:34 +0000

Breski hljómsveitarstjórinn Christopher Warren-Green hefur gegnt stöðu aðalstjórnanda Kammersveitar Lundúna frá árinu 1988 og á árunum 1998 til 2005 var hann auk þess aðalstjórnandi Norrænu kammersveitarinnar og Sinfóníettunnar í Jönköping.

Páll Óskar Hjálmtýsson

Tue, 25 Aug 2009 20:48:57 +0000

Páll Óskar hefur fyrir löngu sungið sig inn í hjörtu landsmanna og er tvímælalaust einn vinsælasti söngvari þjóðarinnar. Hann kemur úr mikilli tónlistarfjölskyldu og hóf snemma að syngja opinberlega. Páll Óskar er þekktastur fyrir að syngja ballöður, diskó, hefðbundin íslensk lög og teknó.

Bernharður Wilkinson

Tue, 25 Aug 2009 20:47:52 +0000

Bernharður Wilkinson hóf tónlistarnám sitt sem kórdrengur við Westminster Abbey í Lundúnum, og lærði síðar flautuleik við Royal Northern College of Music, þar sem aðalkennari hans var Trevor Wye. Hann sótti meistarnámskeið hjá Marcel Moyse, William Bennett og James Galway, og var ráðinn flautuleikari við Sinfóníuhljómsveit Íslands árið 1975.

Gissur Páll Gissurarson

Tue, 25 Aug 2009 20:47:14 +0000

Gissur Páll Gissurarson hóf nám við Söngskólann í Reykjavík veturinn 1997 undir handleiðslu Magnúsar Jónssonar. Hann flutti til Ítalíu veturinn 2001 og hóf nám við Conservatorio G.B Martini í Bologna. Að loknu námi vorið 2005 fór Gissur Páll að sækja einkatíma hjá Kristjáni Jóhannssyni.

Ingibjörg Guðjónsdóttir

Tue, 25 Aug 2009 20:35:15 +0000

Ingibjörg Guðjónsdóttir hóf söngnám hjá Snæbjörgu Snæbjarnardóttur við Tónlistarskóla Garðabæjar og lauk BM-námi við Indiana-háskóla. Hún sótti einnig einkatíma hjá rúmensku söngkonunni Ileana Cotrubas. Ingibjörg hefur komið fram víða í Evrópu og Bandaríkjunum.