• 1.10.2009 19:30
• Háskólabíó
• 3.700 / 3.300
• Kaupa miða

Evrópsk rómantík

Tónlist 19. aldar með þjóðlegu ívafi einkennir fyrstu gulu tónleika starfsársins. Sagt er að Dvorák hafi sjálfur talið fiðlukonsertinn sitt besta verk enda er hann stórkostleg blanda af flæðandi lýrík og hressilegum tékkneskum sveitadönsum.

Það er líka nóg af lífi og fjöri í Skosku sinfóníunni sem Mendelssohn samdi eftir ferðalag til Skotlands 1829 og tileinkaði góðri vinkonu sinni, Viktoríu Bretadrottningu.

Upptaktur að tónleikunum er sprellfjörugur forleikur að gamanóperunni Beátrice og Benedict sem Berlioz byggði á leikriti Shakespeares, Ys og þys út af engu.

Úkraínski stjórnandinn Kirill Karabits er ungur að árum en þó búinn að láta rækilega að sér kveða í tónlistarheiminum. Hann stjórnaði Fílharmóníuhljómsveit Franska útvarpsins um skeið en var síðan kosinn aðalstjórnandi Sinfóníuhljómsveitarinnar í Bournemouth í einróma atkvæðagreiðslu hljóðfæraleikaranna.

Kröftug og einbeitt stjórn hans þykir engu lík og það verður spennandi að sjá hvernig íslensku hljóðfæraleikararnir bregðast við.

Þegar Ilya Gringolts sigraði í Paganini-fiðlukeppninni árið 1998 var hann yngsti keppandi til að komast í úrslit allt frá upphafi. Hann lærði í St. Pétursborg og síðar hjá Itzhak Perlman við Juilliard-skólann og er nú samningsbundinn hjá Deutsche Grammophon. Nýjasti kammerdiskur hans vann til Gramophoneverðlauna og hljóðritun hans á þríleiks-konserti Beethovens undir stjórn Gustavo Dudamel hefur hlotið feykigóðar viðtökur. Gringolts er sönn fiðlustjarna og leik hans verða allir tónlistarunnendur að heyra.

Sækja efnisskrá

• Sækja efnisskrá (pdf)

Senda