Jólatónleikar Sinfóníunnar

Jólatónleikar Sinfóníuhljómsveitarinnar hafa um árabil notið gífurlegra vinsælda meðal gesta á öllum aldri. Á þessum hátíðlegu fjölskyldutónleikum hljóma sígildar jólaperlur í bland við klassísk jólaævintýri og grípandi hljómsveitartónlist sem kemur öllum í jólaskap. Ungir hljóðfæraleikarar, ballettdansarar og einleikarar ásamt stúlknakór Reykjavíkur, Páli Óskari, Jóhönnu Guðrúnu og Kolbrúnu Völkudóttur færa hlustendum jólalögin í sannkölluðum hátíðarbúningi. 

Þá kíkir Maximús Músíkús í heimsókn, biður hljómsveitina um að leika uppáhalds jólalagið sitt og fær gesti í sal til að taka lagið. Barbara trúður hjálpar tónleikagestum að finna jólaandann með óviðjafnanlegum kynningum. Þetta eru tónleikar fyrir jólabörn á öllum aldri.

 Tónleikarnir eru túlkaðir á táknmáli.

Bjöllukór Tónlistarskóla Reykjanesbæjar og Bjöllukór Tónstofu Valgerðar flytja jólalög á undan og eftir tónleikum í Hörpuhorni.