Baldur Brönnimann

Hljómsveitarstjóri

Baldur Brönnimann er hljómsveitarstjóri sem leggur sérstaka áherslu á fræðslu, nýsköpun og þátttöku ungs fólks í tónlistarlífinu. Hann hefur um árabil unnið markvisst að því að skapa tækifæri fyrir unga hljóðfæraleikara, tónskáld og stjórnendur, bæði í gegnum samstarf við ungmennahljómsveitir og með því að þróa ný verkefni og tónleikaform sem höfða til nýrra kynslóða.

Hann er aðalhljómsveitarstjóri og listrænn stjórnandi Real Filharmonia de Galicia og Escola de Altos Estudos Musicais, þar sem hann hefur lagt áherslu á að styðja við unga og upprennandi listamenn og efla tengsl hljómsveitarinnar við nærsamfélagið. Hann er jafnframt stofnandi Desclasificados í Madrid, tónleikaraðar sem veitir ungu tónlistarfólki vettvang til að koma fram og þróa list sína, og námsstjóri Contemporary-Conducting Program við Lucerne Festival Academy, þar sem hann leiðbeinir næstu kynslóð hljómsveitarstjóra.

Samhliða þessu hefur Brönnimann átt farsælan alþjóðlegan feril og stjórnað fjölda virtustu hljómsveita og flutt verk eftir leiðandi tónskáld samtímans á stórum hátíðum á borð við Lucerne og BBC Proms. Hann starfar víða um Evrópu og á tímabilinu 2025/26 eru meðal verkefna hans bæði ný samstarfsverkefni og endurkomur til þekktra hljómsveita.

Í óperuheiminum hefur hann einnig stjórnað fjölbreyttum uppfærslum hjá helstu óperuhúsum Evrópu og Suður-Ameríku. Brönnimann er fæddur í Sviss, menntaður í Basel og Manchester og býr nú í Madrid.