Barbara Hannigan

Aðalhljómsveitarstjóri og listrænn stjórnandi

Kanadíska sópransöngkonan og hljómsveitarsjórinn Barbara Hannigan er aðalhljómsveitarstjóri og listrænn stjórnandi Sinfóníuhljómsveit Íslands frá hausti 2026.

Listræn sýn Barböru Hannigan einkennist af nýsköpun, dirfsku og ferskleika. Verkefnaval hennar kemur oft á óvart en einkennist jafnframt af djúpri hugsun og botnlausri virðingu fyrir tónlistinni. Hún hefur unnið náið með stórum hópi tónskálda, frumflutt fjölda nýrra tónverka og lagt sérstaka rækt við nýja tónlist.

Barbara Hannigan er hlaðin verðlaunum og viðurkenningum fyrir list sína, hefur meðal annars hlotið Grammy- og Gramophone verðlaun, Sonning-verðlaunin og árið 2025 hlaut hún hin virtu Polar-tónlistarverðlaun. Við það tilefni sagði dómnefnd verðlaunanna að „einstakir tónlistarhæfileikar Hannigan og hugrekki geri hana að einum fremsta túlkanda sígildrar- og samtímatónlistar í dag.”

Barbara Hannigan er einnig aðalgestastjórnandi Sinfóníuhljómsveitar Gautaborgar og Kammersveitarinnar í Lausanne og hún er gestalistamaður hjá Fílharmóníusveit franska útvarpsins og Sinfóníuhljómsveit Lundúna. Þá gegnir hún prófessorsstöðu sem kennd er við Reinbert de Leeuw í Royal Academy of Music í Lundúnum.

Hannigan hefur gefið út átta plötur hjá Alpha Classics útgáfunni, nú síðast An American Dream? með Sinfóníuhljómsveit Gautaborgar (2026). Hún hlaut Grammy-verðlaunin fyrir plötuna Crazy Girl Crazy (2017) og síðastliðið vor hreppti hún hin virtu Polar-verðlaun. Barbara leggur rækt við nýjar kynslóðir tónlistarmanna gegnum verkefnin Equilibrium Young Artists, sem var stofnað 2017, og Momentum: our future, now, stofnað 2020. Hún býr í Finistère á norðvesturströnd Frakklands, gegnt æskuslóðum sínum hinum megin Atlantshafsins, Waverley í Nova Scotia.

Hannigan kom fyrst fram með Sinfóníuhljómsveit Íslands árið 2022 þegar hún töfraði áheyrendur með túlkun sinni á verkum eftir Berg, Schönberg, Ives og Gershwin.