Endurvinnslan

Thomas og Jesper eru slagverkssnillingar sem mynda tvíeykið Trash. Þeir leiða gesti Litla tónsprotans, ásamt Sinfóníuhljómsveit Íslands, inn í kraftmikinn og spennandi hljóðheim þar sem klassískur flutningur rennur saman við óhefðbundin hljóðfæri og einstaka hljóðgjafa. Slagverksleikararnir nota m.a. ruslatunnur, hjól og rör á frumlegan og skapandi hátt þar sem hávaða er breytt í hljómandi fegurð. Tónleikagestum er boðið að stíga inn í spennandi og ófyrirsjáanlegt ævintýri sem heldur hlustandanum föngnum frá upphafi til enda.

Á dagskránni eru verk eftir Rossini, Grieg, Khatsjatúrjan, Brahms og fleiri klassíska meistara en skapandi endurvinnsla setur sterkan svip á tónleikana.

Tónleikarnir, sem eru sniðnir að ungum áheyrendum, eru um klukkustundarlangir og án hlés.