EN

Mahler nr. 4

Tryggðu þér besta verðið með 20% afslætti með því að kaupa miða á tvenna tónleika eða fleiri – kaupa kort
Dagsetning Staðsetning Verð
29. apr. 2021 » 20:00 - 21:00 » Fimmtudagur Eldborg | Harpa 2.400 - 5.700 kr.
Hlusta

Stórbrotin fjórða sinfónía Mahlers hljómar á þessum tónleikum Sinfóníuhljómsveitar Íslands undir stjórn Bjarna Frímanns Bjarnasonar.

„Ímyndaðu þér að allur alheimurinn byrji að óma,“ sagði Mahler eitt sinn þegar hann reyndi að skýra inntak tónlistar sinnar. Tónverk hans eru flest stórbrotin og segja magnaðar sögur, en fjórða sinfónían er einstök í sinni röð. Hún er um margt hans aðgengilegasta, samin í fremur klassískum stíl. Hér eins og í öðrum sinfóníum Mahlers skín í gegn ást hans á náttúrunni, rík kímnigáfa, einstakir frásagnarhæfileikar og hrífandi, barnsleg einlægni. Lokaþátturinn er saminn við þýskt þjóðkvæði, „Himnaríkislífið,” sem lýsir töfrandi sýn barns á himnaríki.

Herdís Anna Jónasdóttir lærði á fiðlu, píanó og söng frá unga aldri við Tónlistarskóla Ísafjarðar. Árið 2019 söng hún hlutverk Víólettu í La traviata hjá Íslensku óperunni, en fyrir það hlaut Herdís Grímuverðlaunin sem söngvari ársins. Hljómsveitarstjóri á tónleikunum er Bjarni Frímann Bjarnason en hann gegnir stöðu staðarhljómsveitarstjóra Sinfóníuhljómsveitar Íslands.

Kynnir á tónleikunum er Halla Oddný Magnúsdóttir og er þeim útvarpað beint á Rás 1.

Takmarkað sætaframboð á tónleikana
Í samræmi við sóttvarnarlög er sætaframboð á tónleikana takmarkað við 100 tónleikagesti í fjórum sóttvarnarhólfum í Eldborg. Í það minnsta eitt autt sæti er á milli allra pantana til að tryggja nálægðarmörk milli gesta. Gestum ber skylda að vera með grímu á tónleikunum sem eru um klukkustundarlangir án hlés. Við biðjum gesti að gæta vel að sóttvörnum og kynna sér leiðbeiningar til tónleikagesta áður en mætt er í Hörpu. Stöndum saman, við erum öll almannavarnir.

Tónleikarnir voru upphaflega auglýstir 25. mars en var aflýst vegna hertra samkomutakmarkana. Þá stóð til að Jóna G. Kolbrúnardóttir kæmi fram á tónleikunum en í hennar stað syngur Herdís Anna Jónasdóttir með hljómsveitinni. Miðahafar sem áttu miða á tónleikana eiga sjálfkrafa miða í sömu sæti á nýrri dagsetningu.