Alice Sara Ott

Píanóleikari

Alice Sara Ott fæddist í München árið 1988 og á japanska móður og þýskan föður. Hún hóf píanónám fjögurra ára gömul og vann „Jugend musiziert“ keppnina sjö ára, 14 ára var hún valin efnilegasti flytjandi alþjóðlegu Hamamatsu píanókeppninnar og ári síðar hlaut hún fyrstu verðlaun í Bach-keppninni í Köthen. Síðar nam hún hjá Karl-Heinz Kämmerling við Mozarteum í Salzburg. Í dag er hún talin einn framsæknasti píanóleikari sinnar kynslóðar, dáð fyrir ímyndunarafl sitt og framsækin verkefni. Ott hefur verið samningsbundin Deutsche Grammophon í yfir 15 ár og upptökum hennar verið streymt yfir 500 milljón sinnum, sem endurspeglar stöðu hennar sem einnar áhrifamestu klassísku tónlistarkonu samtímans. 

Á síðasta vetri lék hún með London Symphony Orchestra undir stjórn Gianandrea Noseda, Bayerischer Rundfunk Sinfonieorchester með Karina Canellakis, og flutti píanókonsert Bryce Dessner í Sviss, Bretlandi, Frakklandi, Þýskalandi, Belgíu og Hollandi sem hann samdi fyrir hana. Hún sneri einnig aftur til Bandaríkjanna og lék með sinfóníuhljómsveitum í Baltimore, Minnesota og Pittsburgh eftir frumraun sína með New York Philharmonic. Sem staðarlistamaður í Utrecht setti hún upp fjölbreytt verkefni, en hún hefur einnig verið staðarlistarmaður í Southbank Centre í London og Radio France í París. Árið 2025 gaf hún út tvær plötur hjá Deutsche Grammophon: annars vegar Noktúrnur Johns Fields og hins vegar hljóðritun á verkum Jóhanns Jóhannssonar. 

Í vetur heldur hún sínu striki með flutningi fjölbreyttra verka. Hún flytur Concerto for Two Pianos and Orchestra eftir Bryce Dessner í Berlín, sem og báða píanókonserta Ravels í Chicago. Framundan eru svo einnig fleiri tónleikar þar sem hún leikur meðal annars Noktúrnur Fields, konserta Ravels og og ýmsa konserta og sónötur Beethovens í helstu borgum Evrópu.