Eggert Reginn Kjartansson

Einsöngvari

Tenórsöngvarinn Eggert Reginn Kjartansson hóf söngnám við Tónlistarskólann í Reykjavík árið 2007 og hélt síðar áfram námi við Musik und Kunst Privatuniversität der Stadt Wien, þaðan sem hann útskrifaðist árið 2018. Í Vín tók hann þátt í fjölda óperu- og óperettuuppfærslna og ferðaðist um Austurríki og Þýskaland í hlutverki Baron Koloman Zsupán í Gräfin Mariza eftir Kálmán.

Eggert hefur sungið í verkum á borð við Messías eftir Händel, Magnificat og h-moll messu Bachs og 9. sinfóníu Beethovens. Hann er einn stofnenda Kammeróperunnar og hefur þar sungið hlutverk í Così fan tutte, Hans og Grétu, Brúðkaupi Fígarós og Carmen. Eggert hefur komið einu sinni fram með Sinfóníuhljómsveit Íslands, það var árið 2025 á Klassíkinni okkar.

Á þessu starfsári mun Eggert syngja á móti sópransöngkonunni Hörpu Ósk Halldórsdóttur á hinum árvissu Vínartónleikum hljómsveitarinnar. Stjórnandi verður Christoph Koncz.