EN

Ottensamer stjórnar blásarasveitinni

Föstudagsröð

Áskrift að tónleikaröð eða Regnbogakorti tryggir þér öruggt sæti á besta verðinu með 20% afslætti
Dagsetning Staðsetning Verð
1. nóv. 2024 » 18:00 » Föstudagur Norðurljós | Harpa 4.500 kr.
Kaupa miða
  • Efnisskrá

    Richard Strauss Serenaða fyrir blásara, op. 7
    Ígor Stravinskíj Oktett fyrir blásara
    Richard Strauss Sonatina nr. 1

  • Hljómsveitarstjóri

    Andreas Ottensamer

  • Flytjendur

    Blásarar úr Sinfóníuhljómsveit Íslands

Á þessum föstudagstónleikum láta blásarar Sinfóníuhljómsveitar Íslands ljós sitt skína í þremur ólíkum og hrífandi verkum fyrir blásarasveit. Tvö þeirra eru eftir Richard Strauss, en faðir hans, Franz Strauss, var með færustu hornleikurum sinnar tíðar. Áhuginn á fallegri blásaratónlist var hinum unga Richard Strauss þannig í blóð borinn og margir telja að yndisfagrar laglínurnar í Serenöðunni op. 7 séu innblásnar af sérlega listfengum hornleik föður hans, en verkið samdi Strauss aðeins 17 ára. Sonatina nr. 1 var á hinn bóginn samin meira en sex áratugum síðar, þegar Richard Strauss var á áttræðisaldri og að jafna sig á alvarlegum veikindum. Það var með vísan til þeirra aðstæðna sem hann gaf verkinu hinn gamansama undirtitil „Af verkstæði vesalingsins“. Verkið er uppfullt af þokkafullri gamansemi, angurværð og andagift — verk listamanns sem þrátt fyrir heilsuleysið var auðheyrilega enn í toppformi sem tónskáld.

Oktett Ígors Stravinskíjs fyrir blásara markar upphaf þess sem kallað hefur verið nýklassíska tímabil tónskáldsins, en margir urðu furðu lostnir þegar þessi tónlistarlegi byltingarmaður og höfundur Vorblóts tók óvænta beygju á ferli sínum og fór að finna frumlegum hugmyndum sínum farveg í fáguðum formum klassíska tímans. Það er ekki síst heillandi togstreita hins gamla og nýja sem ljær þessu stórskemmtilega verki töfra sína.

Stjórnandi á tónleikunum er Andreas Ottensamer, leiðandi klarinettuleikari Fílharmóníusveitar Berlínar til margra ára, sem á síðustu árum hefur einnig getið sér gott orð sem hljómsveitarstjóri.

*Tónleikarnir eru u.þ.b. tvær klst. með tuttugu mínútna hléi.