Baggalútur og Sinfó

Tvær ástsælustu hljómsveitir landsins, gleði- og aðventusveitirnar Sinfóníuhljómsveit Íslands og Baggalútur, sameina krafta sína á stórtónleikum í Eldborg í júní. Hefur það verið draumur beggja að leika saman á stóra sviðinu um árabil — og verður það nú loksins að veruleika. Leikin verða fjölmörg gríðarlega vinsæl, fjörug, hugljúf og ástsæl lög Baggalúts á borð við Kósíkvöld í kvöld, Laugardagskvöld og önnur kvöld — ásamt köntrískotnum lögum af rúmlega tveggja áratuga ferli. Lögin eru listilega útsett fyrir hljómsveitina af vandvirku fagfólki — þar sem listrænir núansar og blæbrigði í melódíum og textum fá notið sín til fulls.

Reynt verður á þanþol og taugar hljóðfæraleikara, hraðamet í hljóðfæraslætti slegin auk þess sem gestir alla leið frá útlöndum spreyta sig á framandi hljóðfærum á borð við banjó og óbó.

Á tónleikunum koma einnig fram góðir gestir, þar á meðal söngkonurnar Jóhanna Guðrún, Dísa Jakobs og Una Torfa. Hljómsveitarstjóri er Ross Jamie Collins, staðarhljómsveitarstjóri Sinfóníuhljómsveitar Íslands. 

Óhætt er að lofa skemmtun á heimsmælikvarða fyrir alla unnendur sinfónískrar köntrítónlistar. 

*Tónleikarnir eru u.þ.b. tvær klst. með tuttugu mínútna hléi.