Dimmalimm og Svanavatnið

Listmálarinn Muggur, Guðmundur Thorsteinsson, samdi ævintýrið um Dimmalimm handa lítilli frænku sinni þegar hann var á siglingu í Miðjarðarhafinu. Ævintýrið er meðal helstu gersema listmálarans sem málaði gullfallegar myndir með sögunni sem tónleikagestir njóta í tónleikasal. Tónlist Atla Heimis Sveinssonar við verkið skipaði sér strax í flokk helstu djásna íslenskra tónverka og verður flutt af Sinfóníuhljómsveit Íslands, kórstúlkum úr Graduale-kór Langholtskirkju og dönsurum úr Listdansskóla Íslands. 

Dimmalimm er fylgt úr hlaði með völdum þáttum úr Svanavatninu eftir Tsjajkovskíj. Þessum sannkölluðu ævintýratónleikum lýkur á fjöldasöng með Kvæðinu um fuglana. Kynnir og sögumaður er trúðurinn Barbara, leikinn af Halldóru Geirharðsdóttur.