30. mars 2026

Frábærar Viðtökur í Evrópuferð Sinfóníuhljómsveitar Íslands

Evrópuferð Sinfóníuhljómsveitar Íslands lauk á fimmtudagskvöld á glæsilegum tónleikum í hinu virta tónlistarhúsi Elbphilharmonie í Hamborg. Uppselt var á tónleikana, stemningin frábær og áhorfendur risu úr sætum og fögnuðu sveitinni. Logi Einarsson menningar-, nýsköpunar- og háskóla­ráðherra og Þorgerður Katrín Gunnars­dóttir utanríkis­ráðherra voru viðstödd tónleikana.

Sinfóníuhljómsveitin flutti verkið ARCHORA eftir Önnu Þorvaldsdóttur sem er eitt af hennar þekktustu tónverkum. Staðarlistamaður hljómsveitarinnar, hinn heimsþekkti sellóleikari Kian Soltani, lék einleik í konsert eftir Witold Lutosławski og að lokum flutti hjómsveitin svítu úr Eldfuglinum eftir Ígor Stravinskíj undir stjórn Evu Ollikainen, aðalhljómsveitarstjóra SÍ.

Tónleikarnir fengu frábæra dóma í þýska dagblaðinu Hamburger Abendblatt. Þar sagði gagnrýnandinn Joachim Mischke m.a. þetta:

„Sterk frumraun: Ísland heimsækir Elbphilarmonie – þetta var virkilega frábært”. 

„Þessir tónleikar hafa þegar skipað sér í hóp þeirra áhugaverðustu á árinu”.

Áður lék hljómsveitin á fernum velheppnuðum tónleikum á Evrópuferð sinni. Í Sviss var leikið í Victoria Hall í Genf, Casino í Bern, Tonhalle í Zürich og Stadthalle í Heidelberg á Heidelberger Frühling tónlistarhátíðinni. Alls staðar var leikið fyrir fullu húsi og haut sveitin mjög góðar viðtökur gesta.

Nú í sumarbyrjun eru 100 ár liðin frá heimsókn Fílharmóníuhljómsveitar Hamborgar til Reykjavíkur árið 1926. Heimsóknin markaði tímamót í menningarlífi landsmanna því þá fengu Íslendingar í fyrsta sinn að upplifa sinfóníska tónlist á tónleikum. Það var tónskáldið Jón Leifs sem lyft hafði þessu grettistaki, að koma um 40 tónlistarmönnum úr þýskri atvinnumannahljómsveit frá Hamborg í Þýskalandi hingað til lands. Hljómsveitin lék á fjórtán tónleikum undir stjórn Jóns Leifs.