EN

Edda II - tónleikakynning

í tilefni af frumflutningi á óratoríu Jóns Leifs

Tryggðu þér sæti á besta verðinu - Veldu ferna eða fleiri tónleika á Regnbogakort með 20% afslætti.
  • 21. mar. 2018 » 20:00 Kaldalón | Harpa Aðgangur ókeypis
  • Um viðburð

    Vinafélag Sinfóníunnar stendur fyrir tónleikakynningu með Árna Heimi Ingólfssyni þar sem hann fjallar um Eddu II. Aðgangur er ókeypis.

  • Tónleikakynning

    Árni Heimir Ingólfsson

Vinafélag Sinfóníuhljómsveitar Íslands stendur fyrir fræðandi og skemmtilegri kvöldstund með Árna Heimi Ingólfssyni, tónlistarfræðingi og listrænum ráðgjafa Sinfóníuhljómsveitar Íslands, í Kaldalóni miðvikudagskvöldið 21. mars kl. 20. Þar mun Árni Heimir fræða gesti um óratóríuna Eddu eftir Jón Leifs og sýna áður óbirtar skissur Jóns af verkinu. Auk þess ræðir Árni Heimir við Hörð Áskelsson, kórstjóra Schola cantorum, sem tekur þátt í flutningi á Eddu II ásamt einsöngvurum og Sinfóníuhljómsveit Íslands.

Óratórían Edda, eitt metnaðarfyllsta tónverk íslenskrar tónlistarsögu, er samin við texta úr Eddukvæðum og vann Jón að smíði þess í tæp 40 ár, frá um 1930 og þar til hann lést árið 1968. Fyrsti hluti verksins, Edda I: Sköpun heimsins, var frumfluttur árið 2006 og mun Sinfóníuhljómsveit Íslands flytja annan hluta versksins, Edda II: Líf guðanna, þann 23. mars næstkomandi í tilefni aldarafmælis fullveldis Íslands.

Árni Heimir þekkir mjög vel til verka Jóns Leifs en hann ritaði ævisögu tónskáldsins, Jón Leifs - Líf í tónum, sem kom út árið 2009 og var tilnefnd til Íslensku bókmenntaverðlaunanna.

Aðgangur á kynninguna er ókeypis og allir velkomnir.

Meðlimir Vinafélags Sinfóníuhljómsveitar Íslands fá 20% afslátt af miðaverði þessara sögulegu tónleika hljómsveitarinnar 23. mars.

Skráðu þig í Vinafélagið hér.