Anna Þorvaldsdóttir

Listamaður í samstarfi

Anna Þorvaldsdóttir hefur skipað sér í fremstu röð tónskálda á heimsvísu undanfarin ár og semur m.a. stór sinfónísk verk fyrir helstu hljómsveitir heims. Berlínarfílharmónían og Fílharmóníusveit New York borgar hafa til að mynda frumflutt eftir hana tónverk á undanförnum árum. Anna verður áfram listamaður í samstarfi hjá Sinfóníuhljómsveit Íslands starfsárið 2025/26. Anna gegndi hlutverki staðartónskálds SÍ frá árinu 2018 til ársloka 2023 en samstarf hennar við hljómsveitina spannar enn lengri tíma. Á starfsárinu mun hljómsveitin Íslandsfrumflytja Before we fall, nýjan sellókonsert eftir Önnu, sem saminn var fyrir Johannes Moser. Þá verður verkið ARCHORA flutt á tónleikum hér heima og á öllum tónleikum í Evrópuferð sveitarinnar að vori. Hljómsveitin stendur einnig að pöntun á nýrri sinfóníu eftir Önnu Þorvaldsdóttur sem frumflutt verður á starfsárinu 2026/27.