Dísella Lárusdóttir

Einsöngvari

Sópransöngkonan og Grammy-verðlaunahafinn Dísella Lárusdóttir hefur vakið alþjóðlega athygli fyrir fagra rödd, sterka sviðsframkomu og fjölbreyttan tónlistarstíl. Hún hefur hlotið lof í The New York Times og Opera News og vakti fyrst víðtæka athygli í kjölfar Sönvarakeppni Metropolitan óperunnar í New York árið 2007 og heimildarmyndarinnar The Audition, sem varð upphafið að löngu samstarfi hennar við Metropolitan-óperuna.

Við Metropolitan-óperuna hefur hún sungið hlutverk í verkum á borð við Ástardrykkinn, Parsifal, Töfraflautuna, Jenůfu, Rusalka, Rínargullið og Ragnarök. Hún þreytti frumraun sína á meginlandi Evrópu í titilhlutverki Lulu eftir Alban Berg í Róm árið 2017. Árið 2019 söng hún titilhlutverkið í Proserpine eftir Silviu Colasanti á Spoleto-hátíðinni.

Dísella hefur margoft komið fram með Sinfóníuhljómsveit Íslands: Fyrst á Vínartónleikum árið 2009 og eftir það margoft á Klassíkinni okkar, jólatónleikum og áskriftartónleikum, síðast í maí 2026 er hún söng hlutverk Mater gloriosa í 8. Sinfóníu Mahlers.

Á starfsárinu 2026/27 mun Dísella koma fram á tónleikum helguðum tónlist Ennio Morricone.