Jón Arnar Einarsson

Básúnuleikari

Jón Arnar Einarsson fæddist í Reykjavík árið 1998. Hann var orkumikið barn og gat sjaldan setið kyrr nema til að spila á píanó eða blokkflautu. Hann flutti ungur til Noregs ásamt fjölskyldu sinni, þar sem hann hóf básúnuferil sinn, sjö ára gamall, í lítilli skólalúðrasveit í úthverfi Óslóar. Níu ára flutti hann aftur til Íslands en gaf básúnukennara sínum kveðjubréf þar sem hann skrifaði: „Næst þegar við hittumst verð ég Íslandsmeistari í básúnuleik“. Þegar komið var til Íslands hélt hann áfram tónlistarnámi; fyrst
í Skólahljómsveit Grafarvogs og síðar við Tónlistarskóla FÍH undir handleiðslu Sigurðar Þorbergssonar, básúnuleikara í Sinfóníuhljómsveit Íslands. Að framhaldsprófi loknu lá leiðin aftur til Óslóar, í framhaldsnám við Norges Musikkhøgskole. Kennarar hans þar voru þeir Jonas Bylund og Sverre Riise. Jón Arnar hefur gegnt starfi leiðara básúnudeildar Sinfóníuhljómsveitar Íslands frá árinu 2023.

Jón Arnar var einn af sigurvegurum í keppni Ungra einleikara árið 2021 og lék einleik með Sinfóníuhljómsveit sama vor. Hann er virkur einleikari og kammertónlistarmaður og hefur komið
fram víða hérlendis og erlendis, meðal annars í Noregi, Svíþjóð, Finnlandi, Austurríki, Belgíu og Georgíu. Jón Arnar er áhugasamur um íslenska tónlist og er ötull þátttakandi á sviði nýrrar tónlistar og hefur frumflutt fjöldann allan af íslenskum og erlendum verkum og stuðlað að nýsköpun á því sviði.