Samuel Lee

Hljómsveitarstjóri

 

Samuel Lee sigraði í Malko-keppninni fyrir unga hljómsveitarstjóra árið 2024. Hann hafði þá áður hlotið fyrstu verðlaun í alþjóðlegu BMI hljómsveitarstjórakeppninni í Búkarest og alþjóðlegri keppni í Taipei. Hann starfaði sem aðstoðarhljómsveitarstjóri Sinfóníuhljómsveitarinnar í Cincinnati fram til ársins 2025. Á starfsárinu 2025–26 þreytti Lee frumraun sína með Sinfóníuhljómsveit Íslands á einkar vel heppnuðum tónleikum sem urðu til þess að honum var strax boðið að vinna með hljómsveitinni á nýjan leik.

Hann hefur ennfremur komið fram með hljómsveitum á borð við Tonkünstler Orchestra, Sinfóníuhljómsveitinni í Árósum, Fílharmóníuhljómsveit Kaupmannahafnar, Sinfóníuhljómsveitinni í Malmö, Fílharmóníuhljómsveitinni í Turku, Sinfóníuhljómsveit Kansas-borgar og Útvarpshljómsveit norska ríkisútvarpsins. Hann stjórnaði einnig Þjóðarhljómsveit Kóreu á tónleikaferð til Japans.