EN

Vínartónleikar Sinfóníunnar

Áskrift að tónleikaröð eða Regnbogakorti tryggir þér öruggt sæti á besta verðinu með 20% afslætti
Dagsetning Staðsetning Verð
9. jan. 2025 » 19:30 » Fimmtudagur Eldborg | Harpa 3.900 - 11.900 kr.
10. jan. 2025 » 19:30 » Föstudagur Eldborg | Harpa 3.900 - 11.900 kr.
11. jan. 2025 » 16:00 » Laugardagur Eldborg | Harpa 3.900 - 11.900 kr.
11. jan. 2025 » 19:30 » Laugardagur Eldborg | Harpa 3.900 - 11.900 kr.
Kaupa miða
  • Efnisskrá

    Óperettutónlist, valsar og polkar

  • Hljómsveitarstjóri

    Ville Matvejeff

  • Einsöngvarar

    Bryndís Guðjónsdóttir
    Einar Dagur Jónsson

Hinir sívinsælu Vínartónleikar eru sannkölluð nýársveisla og sú glaðværa tónlist sem þar hljómar gefur tóninn fyrir nýtt ár. Tónleikarnir hafa lengi verið allra vinsælustu tónleikar hljómsveitarinnar og eitthvað sem tónlistarunnendur vilja ekki láta fram hjá sér fara.

Sem endranær stíga á svið tveir glæsilegir einsöngvarar og syngja aríur og dúetta úr vinsælum óperettum, en að þessu sinni eru það þau Bryndís Guðjónsdóttir sópran og tenórinn Einar Dagur Jónsson. Auk þeirra koma fram á tónleikunum glæsilegir dansarar að vanda, enda ómótstæðilegir valsar, polkar og galopp á efnisskránni — sígild Vínartónlist sem kemur öllum í gott skap.

Sópransöngkonan Bryndís Guðjónsdóttir hefur unnið til fjölda verðlauna, komið fram á fjölum óperuhúsa og með ýmsum sinfóníuhljómsveitum, svo sem í Kiel, Kassel, Stuttgart, München, Salzburg, Prag, Róm, Vilnius, Sevilla og Madrid. Hún hefur áður komið fram með Sinfóníuhljómsveit Íslands, nú síðast á tónleikum sveitarinnar helguðum verkum Önnu Þorvaldsdóttur í október 2023.

Efnisskrá Bryndísar er breið og spannar margar aldir, en hún lauk bæði bakkalárs- og meistaragráðu með láði frá Mozarteum tónlistarháskólanum í Salzburg.

Einar Dagur Jónsson tenór er fæddur 1996. Hann hóf söngnám árið 2013 í Söngskólanum í Reykjavík undir handleiðslu Egils Árna Pálssonar og Önnu Rúnar Atladóttur. Einar hefur þrátt fyrir ungan aldur sungið hlutverk Gastone í La Traviata undir stjórn Garðars Cortes og sungið einsöng með Sinfóníuhljómsveit Íslands undir stjórn Rico Saccani.

Í ár er það hinn finnski Ville Matvejeff sem stjórnar tónleikunum en hann hefur á síðustu árum getið sér gott orð sem hljómsveitarstjóri, tónskáld og píanóleikari.

Matvejeff vinnur með sinfóníuhljómsveitum og í óperum og er listrænn stjórnandi Savonlinna óperuhátíðarinnar í Finnlandi og aðalhljómsveitarstjóri Norrland-óperuhljómsveitarinnar í Svíþjóð.

*Tónleikarnir eru u.þ.b. tvær klst. með tuttugu mínútna hléi.