Bryndís Guðjónsdóttir

Sópran

Sópransöngkonan Bryndís Guðjónsdóttir lauk meistaraprófi í óperusöng árið 2021frá Mozarteum tónlistarháskólanum í Salzburg, þar sem hún útskrifaðist summa cum laude undir handleiðslu prófessors Michèle Crider. Áður en hún flutti til Salzburg stundaði hún nám við Listaháskóla Íslands hjá Þóru Einarsdóttur, Kristni Sigmundssyni og Ólöfu Kolbrúnu Harðardóttur. Bryndís hefur hlotið fjölda verðlauna, þar á meðal Grímuna - íslensku sviðslistaverðlaunin, árið 2025 fyrir hlutverk greifynjunnar í Brúðkaupi Fígarós. Hún hlaut einnig fyrstu verðlaun í Certamen Nuevas Voces Ciudad de Sevilla árið 2022 og í Riccardo Zandonai-keppninni árið 2021.

Hún hefur komið fram í óperuhúsum og tónleikasölum víða um Evrópu, meðal annars í Dresden, Essen, Dortmund, Madrid, München, Salzburg, Prag, Reykjavík, Róm og Vilníus.

Bryndís hefur komið margoft fram með Sinfóníuhljómsveit Íslands, m.a. á Vínartónleikum 2025 og við flutning 8. Sinfóníu Gustavs Mahler í maí 2026. Á starfsárinu kemur Bryndís fram á Klassíkinni okkar í ágústlok, í afmælisfagnaði Mozarts í Litla tónsprotanum og ásamt Ólafi Kjartani Sigurðarsyni við flutning á Lýrískri sinfóníu Zemlinskys udir stjórn Ingos Metzmacher.