Daníel Bjarnason

Daníel Bjarnason hefur átt farsælt samstarf við Sinfóníuhljómsveit Íslands í rúman áratug, sem hljómsveitarstjóri og tónskáld. Hann var staðarlistamaður á árunum 2015 til 2018 og aðalgestastjórnandi á árunum 2019 til 2021, en starfar nú með sveitinni sem listamaður í samstarfi. Tónsmíðar Daníels hafa vakið mikla athygli utan landsteinanna og hafa verið frumflutt eftir hann verk hjá helstu hljómsveitum heims. Á starfsárinu 2025/26 mun Daníel stjórna hljómsveitinni í eigin verki, I Want To Be Alive. Þá stjórnar hann tónleikum með verkum Caroline Shaw þar sem hún er einnig í einleikshlutverkinu. Að lokum mun Daníel stjórna hljómsveitinni í hljóðritunum hjá útgáfufyrirtækinu Sono Luminus.