Kian Soltani

Kian Soltani er einn fremsti sellóleikari samtímans, rómaður fyrir tæknilega fullkomnun og tilfinningalega túlkun. Soltani, sem er Austurríkismaður af persneskum ættum, fléttar gjarnan saman tónlistarhefðum austurs og vesturs, til að mynda í hljóðritunum sínum fyrir Deutsche Grammophon. Hann hefur tvisvar sótt Ísland heim, þegar hann lék með hljómsveitinni sellókonserta Roberts Schumann og Edwards Elgar. Flutningur hans vakti mikla hrifningu og var honum boðið að vera staðarlistamaður Sinfóníuhljómsveitar Íslands starfsárið 2025/26. Á starfsárinu kemur Soltani fram með sveitinni á þrennum tónleikum í Eldborg þar sem hann flytur sellókonsert í C-dúr eftir Haydn undir stjórn Mirians Khukhunaishvili og sellókonserta eftir Lutosławski og Elgar. Soltani verður jafnframt einleikari í Evrópuferð sveitarinnar og mun leika einleik á öllum sex tónleikum ferðarinnar.