Eva og Arngunnur

Júpíter-sinfónían er síðasta og viðamesta sinfónía Wolfgangs Amadeusar Mozart og að margra dómi ekki aðeins besta sinfónía hans, heldur alls klassíska tímabilsins. Hún er upphafsverkið á þessum fjölbreyttu og óvenjulegu tónleikum þar sem Eva Ollikainen aðalhljómsveitarstjóri heldur um tónsprotann. Einleikari á tónleikunum er Arngunnur Árnadóttir, leiðandi klarínettleikari Sinfóníuhljómsveitar Íslands, en hún hefur áður komið fram með sveitinni sem einleikari og skrifaði gagnrýnandi Fréttablaðsins um túlkun hennar á klarínettkonserti Mozarts 2015: „Með því fegursta sem ég hef lengi heyrt [...] Þetta var dásamlegur flutningur.“ 

Nú bræðir Arngunnur saman tvö ólík en áhrifamikil frönsk verk fyrir hljóðfærið. Fyrst hljómar Hyldýpi fuglanna úr Kvartett um endalok tímans eftir Olivier Messiaen, verk sem var samið og frumflutt meðan tónskáldið var stríðsfangi í fangabúðum nasista. Einleikskaflinn er án meðleiks, eins konar eintal sálarinnar þar sem ljós og skuggar mætast. Í beinu framhaldi leikur Arngunnur Première Rhapsodie eftir Claude Debussy fyrir klarínett og hljómsveit, litríkt glæsiverk sem gerir ómældar kröfur til einleikarans. Síðasta verkið á efnisskránni er Dauði og uppljómun eftir Richard Strauss, heimspekilegt tónaljóð sem kannar ráðgátuna um hvað bíður handan þessa lífs.