Klassíkin okkar – Leikhúsveisla

Undanfarin fimm ár hafa Sinfóníuhljómsveit Íslands og RÚV efnt til glæsilegra tónleika undir yfirskriftinni „Klassíkin okkar“ sem hafa hlotið gífurlega athygli og vinsældir.

Þann 3. september næstkomandi verða sjöttu tónleikarnir af þessum toga haldnir í Hörpu og að þessu sinni verður athyglinni beint að leikhústónlist, úr innlendum jafnt sem erlendum verkum frá ýmsum tímum.

Meðal þeirra gimsteina sem hljóma á tónleikunum má nefna Afmælisdiktur („Í Skólavörðuholtið hátt“) eftir Atla Heimi Sveinsson, Söng Sólveigar eftir Hjálmar H. Ragnarsson, Maístjörnuna eftir Jón Ásgeirsson, og lög úr vinsælum söngleikum eins og Vesalingunum og West Side Story.

Vorið 2021 gafst Íslendingum færi á að kjósa sitt uppáhalds íslenska leikhúslag á ruv.is og verða þau lög sem hlutu flest atkvæði flutt á tónleikunum, sem eru sýndir í beinni útsendingu á RÚV.

Tónleikarnir eru samstarfsverkefni Sinfóníuhljómsveitar Íslands, Þjóðleikhússins og RÚV.

Framúrskarandi söngvarar, leikarar og kórar koma fram í þessari einstöku dagskrá þar sem töfrar leikhússins verða í algleymingi.