Alina Ibragimova

Fiðla

 

Alina Ibragimova er fædd í Rússlandi árið 1985 og af tónlistarfólki komin. Hún hóf fiðlunám fjögurra ára gömul og hlaut inngöngu í Gnessin-tónlistarskólann í Moskvu, en þegar hún var tíu ára flutti fjölskyldan til Lundúna þar sem hún hóf nám við Yehudi Menuhin-skólann. Hún lék tvíkonsert Bachs ásamt Nicola Benedetti árið 1998 undir stjórn Menuhins sjálfs, þremur mánuðum áður en hann lést, og var valin til að leika við útför hans í Westminster Abbey. Hún hefur um árabil leikið með helstu hljómsveitum heims og haldið einleikstónleika á Wigmore Hall, Carnegie Hall, Concertgebouw í Amsterdam og í Elbphilharmonie í Hamborg. Hljóðritun hennar á fiðlukonsertum Shostakovitsj hlaut Gramophone-verðlaunin árið 2020 og hljóðritun hennar á 24 caprice-verkum Paganinis lenti efst á sölulistum klassískrar tónlistar árið 2021. Hún er stofnmeðlimur Chiaroscuro-kvartettsins og hlaut MBE-heiðursmerki árið 2016 fyrir störf sín í þágu tónlistarinnar.

Alina Ibragimova kom fram með Sinfóníuhljómsveit Íslands árið 2017 og lék þá fiðlukonsert Brahms undir stjórn Yan Pascal Tortelier.