Barbara Hannigan
Kanadíska sópransöngkonan og hljómsveitarstjórinn
Barbara Hannigan er einkar skapandi listamaður sem
gæðir tónlistina lífi með óviðjafnanlegri tilfinningu fyrir hinu
dramatíska. Hún hefur lagt sérstaka rækt við samtímatónlist og frumflutt yfir 90 ný verk. Í hópi samverkamanna
hennar á 30 ára ferli eru Reinbert de Leeuw, Pierre Boulez,
Sasha Waltz, John Zorn, Krszysztof Warlikowski, Simon
Rattle, Katie Mitchell, Henri Dutilleux, Vladimir Jurowski,
György Ligeti, Kirill Petrenko, George Benjamin, Andreas
Kriegenburg og Hans Abrahamsen.
Barbara Hannigan er aðalgestastjórnandi Sinfóníuhljómsveitar Gautaborgar og Kammersveitarinnar í Lausanne
og hún er gestalistamaður hjá Fílharmóníusveit franska
útvarpsins og Sinfóníuhljómsveit Lundúna. Þá gegnir
hún prófessorsstöðu sem kennd er við Reinbert de
Leeuw í Royal Academy of Music í Lundúnum. Barbara
hefur gefið út sex plötur hjá Alpha Classics útgáfunni,
nú síðast Infinite Voyage (2023). Hún hlaut Grammyverðlaunin fyrir plötuna Crazy Girl Crazy (2017). Barbara
leggur rækt við nýjar kynslóðir tónlistarmanna gegnum
verkefnin Equilibrium Young Artists, sem var stofnað
2017, og Momentum: our future, now, stofnað 2020. Hún
býr í Finistère á norðvesturströnd Frakklands, gegnt
æskuslóðum sínum hinum megin Atlantshafsins, Waverley
í Nova Scotia.
Þetta er í þriðja sinn sem Barbara sækir Sinfóníuhljómsveit
Íslands heim. Hún kom hingað fyrst á Listahátíð 2022 og
töfraði áheyrendur með túlkun sinni á verkum eftir Berg,
Schönberg, Ives og Gershwin. Hún snéri svo aftur í júní
síðastliðnum og stjórnaði þá m.a. fjórðu sinfóníu Mahlers
bæði hér í Eldborg og í Hofi á Akureyri.