Hanna Dóra Sturludóttir

Einsöngvari

Hanna Dóra Sturludóttir stundaði söngnám hjá Kristni Sigmundssyni og Snæbjörgu Snæbjarnardóttur við Söngskólann í Reykjavík áður en hún hélt til framhaldsnáms við Listaháskólann í Berlín. Kennarar hennar þar voru m.a. Dietrich Fischer-Dieskau og Aribert Reimann og útskrifaðist hún með viðurkenningu fyrir framúrskarandi árangur. Stuttu síðar fékk hún tilnefningu sem efnilegasta söngkona Þýskalands.

Hanna Dóra hefur sungið við mörg helstu óperuhús Þýskalands, meðal annars í Bonn, Weimar, Gelsenkirchen, Kassel og Berlín. Á meðal þeirra um það bil 40 hlutverka sem hún hefur túlkað á ferlinum eru Greifynjan í Brúðkaupi Fígarós, Cio Cio San í Madam Butterfly, Marie í Wozzeck, Miss Jessel í Tökin hert og titilhlutverkið í óperunni Ariadne á Naxos sem hún söng í Íslensku óperunni 2007. Haustið 2010 söng Hanna Dóra Miss Donnithorne´s Maggot eftir Peter Maxwell Davies í Staatsoper í Berlín og hlaut fyrir það mikið lof gagnrýnenda. Hanna Dóra hefur komið fram á tónleikum vítt og breitt um Þýskaland, öðrum Evrópulöndum sem og í Katar og Egyptalandi. 

Á Íslandi hefur Hanna Dóra haldið fjölda ljóðatónleika og sungið með Sinfóníuhljómsveit Íslands við fjölmörg tækifæri og árið 2014 söng hún verk Arnolds Schönberg, Pierrot lunaire, með Kammersveit Reykjavíkur á Listahátíð í Reykjavík. Hanna Dóra var tilnefnd til Íslensku tónlistarverðlaunanna 2013 fyrir flutning sinn á Wesendonck-ljóðum Richards Wagner með Sinfóníuhljómsveit Íslands vorið 2013 og fyrir túlkun sína á titilhlutverkinu í Carmen eftir Bizet hjá Íslensku óperunni. Hún söng hlutverk Eboli prinsessu í uppsetningu Íslensku óperunnar á Don Carlo eftir Verdi og hlaut í kjölfarið Íslensku tónlistarverðlaunin sem söngkona ársins 2014. Hún söng einnig í Evgení Onegin og Don Giovanni hjá Íslensku óperunni og fékk nýverið mikið lof fyrir söng sinn í óperunni Die Passagierin í Gelsenkirchen í Þýskalandi.