Söngsveitin Fílharmónía

Söngsveitin Fílharmónía var stofnuð árið 1959 af dr. Róberti Abraham Ottóssyni og áhugafólki um flutning sígildra kórverka. Fyrsta verkefni kórsins var Carmina Burana eftir Carl Orff sem flutt var með Sinfóníuhljómsveit Íslands. Fyrsta aldarfjórðunginn starfaði kórinn náið með hljómsveitinni og með henni frumflutti hann fjölda kórverka á Íslandi. Í gegnum árin hefur kórinn flutt fjölbreytta tónlist frá ýmsum tímabilum, allt frá sígildum kórverkum til léttari tónlistar af ýmsu tagi. Á undanförnum árum hefur Söngsveitin Fílharmónía reglulega tekið þátt í tónleikum á vegum Sinfóníuhljómsveitar Íslands, s.s. „Klassíkinni okkar“, Sálumessu Brahms, Carmina Burana eftir Carl Orff, sungið tónlist úr kvikmyndum og tölvuleikjum og nú síðast í 8. sinfóníu Mahlers. Þá hefur kórinn einnig komið fram með Sinfóníuhljómsveit Norðurlands og Ungsveit Sinfóníunnar og flutt Sálumessu Mozarts og 9. sinfóníu Beethovens. Söngsveitin Fílharmónía hefur flutt viðamikil kórverk ásamt einsöngvurum og hljómsveitum, meðal annars Sálumessu Verdis í tilefni af 60 ára afmæli kórsins, Krýningarmessu Mozarts í Salzburg, Jólaóratoríuna eftir J.S. Bach, Messu heilagrar Sesselju eftir Joseph Haydn og Stabat Mater eftir Dvořák. Kórinn hefur einnig tekið þátt í að flytja tónlist úr kvikmyndunum um Hringadróttinssögu og komið fram á stórtónleikum með tenórstjörnunni Andrea Boccelli. Þá hefur kórinn tekið þátt í kórakeppnum á erlendri grund og hlotið viðurkenningar fyrir, síðast í Salzburg sumarið 2022. Sumarið 2025 fór kórinn til Englands og söng þar meðal annars með tónleikahljómsveit BBC á tónleikum tileinkuðum norrænni tónlist sem útvarpað var í þættinum Friday Night is Music Night á BBC3. Söngsveitin Fílharmónía hefur á undanförnum árum unnið að upptökum á íslenskri kórtónlist og gefið út á helstu tónlistarstreymisveitum. Kórinn gaf einnig nýlega út upptöku sína af verkinu Heimsljós eftir Tryggva M. Baldvinsson sem hann samdi árið 2010 í tilefni af 50 ára afmæli kórsins. Stjórnandi Söngsveitarinnar Fílharmóníu er Magnús Ragnarsson.