EN

Föstudagsröðin

Stríð og friður

Tryggðu þér besta sætið með 20% afslætti með áskrift að tónleikaröð eða veldu ferna eða fleiri tónleika á Regnbogakort með 20% afslætti.
  • 16. feb. 2018 » 18:00 Norðurljós | Harpa 2.900 kr.
  • Kaupa miða
  • Efnisskrá

    Gideon Klein Tríó fyrir strengi
    Olivier Messiaen Þættir úr Kvartett fyrir endalok tímans
    Dmítríj Shostakovitsj Sinfónía nr. 6

  • Stjórnandi og klarínettleikari

    Osmo Vänskä

  • Einleikarar

    Sigrún Eðvaldsdóttir fiðla
    Þórunn Ósk Marínósdóttir víóla
    Bryndís Halla Gylfadóttir selló
    Domenico Codispoti píanó

Á árum heimsstyrjaldarinnar síðari varð til ógrynni tónlistar sem með einum eða öðrum hætti tjáir þær ógnir sem blöstu við. Hér hljóma verk eftir þrjú tónskáld sem öll kynntust hildarleiknum á sinn hátt. 

Gideon Klein var gyðingaættar og samdi meistaralegt strengjatríó sitt í fangabúðum nasista árið 1944. Níu dögum eftir að hann fullgerði tríóið var hann fluttur í útrýmingarbúðirnar í Auschwitz. 

Olivier Messiaen barðist fyrir Frakkland í styrjöldinni og var um skeið stríðsfangi nasista. Í fangabúðunum fékk hann leyfi til að semja tónlist og þar varð til eitt mesta kammerverk 20. aldar, Kvartett fyrir endalok tímans. 

Hér hljómar meðal annars þáttur verksins fyrir einleiksklarínett, Hyldýpi fuglanna, leikið af Osmo Vänskä sem er frábær klarínettleikari auk þess að vera snillingur með tónsprotann. 

Tónleikunum lýkur á sinfóníu nr. 6 eftir Shostakovitsj, sem hann lauk við rétt um það leyti sem heimsstyrjöldin síðari braust út. Þetta er verk sterkra andstæðna, þar sem djúpur tregi og léttari stemningar togast á. 

Tónleikar Föstudagsraðarinnar eru um klukkustundarlangir þar sem teflt er saman hljómsveitarverki og einleiksverki. Tilvalinn endapunktur á góðri vinnuviku eða frábær upptaktur að skemmtilegu föstudagskvöldi. 

Upphaflega stóð til að Daniel Schmitt og Anna Guðný Guðmundsdóttir léku í kvartettinum en í þeirra stað koma þau Þórunn Ósk Marínósdóttir og Domenico Codispoti.

Kynnar eru Halla Oddný og Guðni Tómasson.