EN

Sinfóníuhljómsveit Íslands

Sinfóníuhljómsveit Íslands var stofnuð vorið 1950 og hefur um langt árabil verið í fremstu röð hljómsveita á Norðurlöndum enda fengið afbragðs dóma jafnt fyrir hljóðritanir sínar sem og tónleika heima og erlendis. Vorið 2011 varð Harpa, tónlistar- og ráðstefnuhús, heimili Sinfóníuhljómsveitar Íslands. Hljómsveitin heldur um 100 tónleika á hverju starfsári, m.a. áskriftartónleika með heimsþekktum stjórnendum og einleikurum sem útvarpað er beint á Rás 1, fjölskyldu- og skólatónleika ásamt því að hljóðrita fyrir innlend og erlend útgáfufyrirtæki. Hljóðritanir hljómsveitarinnar hafa komið út m.a. á vegum Deutsche Grammophon, Chandos og BIS, og hafa hlotið fjölda viðurkenninga auk tilnefningar til Grammy-verðlauna fyrir besta hljómsveitardisk. 

Hljómsveitin hefur komið fram á tónleikum við góðan orðstír m.a. í Bretlandi, Bandaríkjunum, Þýskalandi og Frakklandi. Í nóvember 2018 hélt hljómsveitin í velheppnaða þriggja vikna tónleikaferð um Japan með Vladimir Ashkenazy, aðalheiðursstjórnanda hljómsveitarinnar. Franski stjórnandinn Yan Pascal Tortelier tók við stöðu aðalhljómsveitarstjóra árið 2016. Osmo Vänskä, sem gegndi sömu stöðu frá 1993 til 1996, er heiðurs- og gestastjórnandi hljómsveitarinnar. Anna Þorvaldsdóttir tók við stöðu staðartónskálds í byrjun árs 2018, en áður hafði Daníel Bjarnason gegnt starfinu til þriggja ára. Bjarni Frímann Bjarnason var ráðinn aðstoðarhljómsveitarstjóri árið 2018.