Fílalag og Sinfó

Hlaðvarpið Fílalag hefur undanfarin ár skipað sér sess sem einn vinsælasti tónlistarþáttur landsins. Nú stíga þáttastjórnendurnir Bergur Ebbi og Snorri Helgason í fyrsta sinn á svið með Sinfóníuhljómsveit Íslands í Eldborg þar sem þeir leggja á djúpið og fíla tónlist sem fullskipuð sinfóníuhljómsveit flytur svo í allri sinni dýrð. Hér hljóma klassísk tónverk sem fléttast hafa saman við dægurmenningu og samtímasögu á ýmsan hátt: klassísk verk sem orðið hafa dægurtónlistarmönnum innblástur, popplög sem eiga sér klassískt hliðarsjálf og tónlist sem hljómað hefur í vinsælum kvikmyndum eða við merkingarþrungnar aðstæður – allt annars staðar en á sinfóníutónleikum. 

Á tónleikunum hljómar meðal annars hið volduga Finlandia eftir Sibelius og Eldur eftir Jórunni Viðar ásamt því að hljómsveitin flytur brot úr verkum eftir Prokofíev, Wagner, Önnu Þorvaldsdóttur, Strauss, Mozart, Atla Heimi Sveinsson og Dvořák.

Bergur Ebbi á að baki langan feril sem rithöfundur, uppistandari og fyrirlesari og Snorri Helgason hefur starfað sem tónlistarmaður
í hálfan annan áratug og á að baki fjölmargar sólóplötur og leikhúsverkefni. Saman hafa þeir sent út hlaðvarpið Fílalag frá árinu 2014, þættirnir eru orðnir á þriðja hundrað talsins og samanlagðar hlustanir nærri milljón. Þeir hafa stigið á svið í Borgarleikhúsinu með sýningar upp úr hlaðvarpinu, en auk þess voru sjónvarpsþættir þeirra félaga um íslensk dægurlög sýndir á RÚV síðasta vor.

 Tónleikar fyrir öll þau sem fíla Sinfó.