Dagsetning | Staðsetning | Verð |
---|---|---|
11. mar. 2021 » 20:00 - 21:00 » Fimmtudagur | Eldborg | Harpa | 2.500 - 7.800 kr. |
-
Efnisskrá
Camille Saint-Saëns Rómansa fyrir flautu og hljómsveit
Cécile Chaminade Concertino fyrir flautu og hljómsveit
Johannes Brahms Sinfónía nr. 4
-
Hljómsveitarstjóri
-
Einleikari
-
Kynnir
Halla Oddný Magnúsdóttir
Sinfóníuhljómsveit Íslands flytur nokkur hrífandi meistaraverk franskrar og þýskrar tónlistar frá því um aldamótin 1900.
Hugljúf Rómansa Saint-Saëns er eitt hans kunnasta verk en færri hafa heyrt um Cécile Chaminade. Hún naut mikilla vinsælda á sinni tíð, samdi yfir 400 verk á langri ævi og var fyrsta kventónskáldið sem hlaut riddaraorðu franska lýðveldisins. Concertino fyrir flautu var lykilverk á ferli hennar, samið fyrir einleikarakeppni Tónlistarháskólans í París árið 1902 og hefur verið fastur liður á efnisskrám flautuleikara allar götur síðan.
Johannes Brahms lítur einnig um öxl í hinni stórfenglegu fjórðu sinfóníu sinni, sem var eitt síðasta hljómsveitarverk hans. Sinfónían ber vott um einlægan áhuga hans á tónlist barokksins, ekki síst verkum Bachs sem hann kynnti sér af mikilli gaumgæfni enda er bæði stef lokaþáttarins og útfærsla þess undir beinum áhrifum frá meistara Bach.
Emilía Rós Sigfúsdóttir hefur á undanförnum árum vakið mikla athygli fyrir frábæran flautuleik og hrífandi sviðsframkomu. Einleiksdiskur hennar, Portrait, hlaut lofsamlega umfjöllun í tímaritinu Gramophone, og einnig fékk hún fimm stjörnu krítík í Fréttablaðinu fyrir flutning á flautukonserti Iberts árið 2016. „Það var unaður að heyra hana leika“, sagði rýnir blaðsins af því tilefni. Hljómsveitarstjóri er norski hljómsveitarstjórinn Eivind Aadland.
Tónleikunum er útvarpað beint á Rás 1.
Takmarkað sætaframboð á tónleikana
Í samræmi við sóttvarnarlög er sætaframboð á tónleikana takmarkað við 200 tónleikagesti í fjórum sóttvarnarhólfum í Eldborg. Í það minnsta eitt autt sæti er á milli allra pantana til að tryggja nálægðarmörk milli gesta. Gestum ber skylda að vera með grímu á tónleikunum sem eru um klukkustundarlangir án hlés. Við biðjum gesti að gæta vel að sóttvörnum og kynna sér leiðbeiningar til tónleikagesta áður en mætt er í Hörpu. Stöndum saman, við erum öll almannavarnir.