EN

Portrett af Stephen Hough

Einleikstónleikar í Föstudagsröð

Tryggðu þér besta verðið með 20% afslætti með því að kaupa miða á ferna tónleika eða fleiri – Regnbogakort
Dagsetning Staðsetning Verð
13. jan. 2023 » 18:00 » Föstudagur Norðurljós | Harpa 3.900 kr
Kaupa miða
  • Efnisskrá

    Claude Debussy Estampes
    Stephen Hough Partita
    Franz Liszt Petrarca-sonnetta nr. 123
    Franz Liszt Dante-sónata (úr Années de Pèlerinage)

  • Einleikari

    Stephen Hough

Á þessum föstudagstónleikum í Norðurljósum fá áheyrendur að kynnast hinni hliðinni á Stephen Hough, listamanni í samstarfi hjá Sinfóníuhljómsveit Íslands, en kvöldið áður leikur hann píanókonsert nr. 3 eftir Beethoven með hljómsveitinni. Hér leikur Hough hins vegar nokkur hrífandi og virtúósísk einleiksverk úr ólíkum áttum. Tónleikunum lýkur svo á upplestri hans úr einni bóka sinna og spjalli um listina og lífið, en fáir listamenn samtímans eru viðlíka fjölhæfir og Hough sem auk píanóleiksins er bæði tónskáld, rithöfundur og listmálari.

Efnisskráin ber vitni um vítt áhugasvið einleikarans: Estampes eftir Debussy er einstaklega myndræn og litrík tónlist (en estampes merkir einmitt þrykk) sem magnar upp andrúmsloft fjarlægra slóða. En verkin tvö eftir Franz Liszt eru á hinn bóginn innblásin af bókmenntum, nánar tiltekið af verkum tveggja höfuðskálda Ítalíu, Dante og Petrarca. Á efnisskránni er einnig að finna eina af tónsmíðum Houghs sjálfs, Partítu, sem sækir innblástur jafnt til stórbrotinna trúarlegra verka fyrir orgel og tónlistar katalónska tónskáldsins Federico Mompou.