Klassíkin okkar: Heimur óperunnar

Í vor efndu Sinfóníuhljómsveit Íslands og RÚV í samvinnu við Íslensku óperuna til netkosningar þar sem allir landsmenn gátu valið eftirlætis óperuaríurnar sínar. Tónleikarnir „Klassíkin okkar“ sem haldnir voru í fyrrahaust vöktu mikla hrifningu og nú verður leikurinn endurtekinn með áherslu á óperutónlist. Hægt var að velja úr lista með vinsælum aríum eða tilnefna aðrar. Þau tónverk sem voru hlutskörpust munu hljóma á sérstökum hátíðartóneikum Sinfóníunnar sem um leið er upptaktur að glæsilegu starfsári Sinfóníuhljómsveitarinnar.

Þátttaka í kosningunni fór fram úr björtustu vonum og hlutskarpasta arían var Habanera úr Carmen, sem Sigríður Ósk Kristjánsdóttir mun flytja. 

Alls koma tíu einsöngvarar fram á tónleikunum: Þóra Einarsdóttir, Sigrún Hjálmtýsdóttir, Dísella Lárusdóttir, Hallveig Rúnarsdóttir, Suzanne Fischer, Sigríður Ósk Kristjánsdóttir, Hildigunnur Einarsdóttir, Elmar Gilbertsson, Ólafur Kjartan Sigurðarson og Kristinn Sigmundsson. Með þeim syngja Kór Íslensku óperunnar undir stjórn Magnúsar Ragnarssonar, og Karlakór Kópavogs og Óperukórinn í Reykjavík undir stjórn Garðars Cortes. Daníel Bjarnason, staðarlistamaður Sinfóníuhljómsveitar Íslands er hljómsveitarstjóri tónleikanna.

Kynnar eru Oddný Halla Magnúsdóttir og Guðni Tómasson en tónleikarnir verða í beinni sjónvarpsútsendingu á RÚV.