Sellókonsert Dvořáks

„Maður hálfdansaði út úr Hörpunni á eftir“ sagði rýnir Fréttablaðsins eftir tónleika Peters Oundjian og Sinfóníuhljómsveitarinnar í Toronto í Reykjavík 2014 og bætti við að þeir hefðu verið „með flottustu klassísku tónleikum ársins“. Oundjian lék um árabil með Tókýó-strengjakvartettinum heimskunna og var lengi aðalstjórnandi Sinfóníuhljómsveitarinnar í Toronto. Hann kemur nú til Íslands í þriðja sinn og er hægt að lofa innblásnum flutningi þegar hann á í hlut.

Danski sellóleikarinn Jonathan Swensen hefur undanfarin ár sópað að sér verðlaunum í alþjóðlegum keppnum og hlaut einnig Leonie Sonning-verðlaunin í heimalandi sínu fyrir framúrskarandi leik. Hann leikur sellókonsert Dvořáks sem er eitt dáðasta verk sinnar tegundar, í senn flugeldasýning og hjartnæmur söngur sem tjáir sorg og söknuð.

Á tónleikunum hljómar einnig glæsilegur Konsert fyrir hljómsveit sem Joan Tower samdi árið 1991 að beiðni þriggja bandarískra sinfóníuhljómsveita, í New York, Chicago og St. Louis. Tower hefur unnið til Grammy-verðlauna fyrir tónlist sína og var fyrsta konan til að hljóta hin virtu Grawemeyer-tónskáldaverðlaun. Um konsert hennar fyrir hljómsveit sagði gagnrýnandi New York-tímaritsins að hann væri „litríkt og innblásið verk sem mun án efa teljast í flokki hinna bestu sem hún hefur samið“.