Þrír sigurvegarar í keppni ungra einleikar 2023
Seinni umferð Ungra einleikara 2023 lauk nú í janúar en keppnin var nú haldin í tuttugasta sinn. Ungir einleikarar er samstarfsverkefni LHÍ og Sinfóníuhljómsveitar Íslands en sigurvegarar keppninnar fá tækifæri til þess að flytja einleik á Eldborgarsviði Hörpu ásamt Sinfóníuhljómsveitinni. Keppnin tók breytingum á síðasta ári þegar ákveðið var að opna keppnina fyrir nemendum á öllum stigum háskólanáms og þá var aldurstakmark einnig afnumið. Þessar breytingar eru gerðar með þróun tónlistarnáms á háskólastigi til hliðsjónar og opna enn frekari möguleika allra sem það stunda. Snið keppninnar tók einnig breytingum á síðasta ári þegar ákveðið var að skipta keppninni í tvær umferðir. Þessar breytingar hafa gefið góða raun og hélt keppnin því óbreyttu sniði síðasta árs.
Keppnin var afar ströng að vanda enda hópur umsækjenda stór og fjölbreyttur. Að lokinni fyrri umferð voru sjö keppendur boðaðir í þá seinni. Þriggja manna dómnefnd fékk það vandasama hlutverk að velja sigurvegarana þrjá en dómnefnd skipuðu þau Sigrún Eðvaldsdóttir, konsertmeistari SÍ, Hildigunnur Einarsdóttir, söngkona og Nathanaël Iselin, staðarhljómsveitarstjóri SÍ sem stórnar tónleikum Ungra einleikarar í vor.
Sigurvegarar Ungra einleikara 2023 eru eftirfarandi;
Ólafur Freyr Birkisson, söngvari
Ragnheiður Ingunn Jóhannsdóttir, söngkona
Þórhildur Magnúsdóttir, víóluleikari
Við óskum sigurvegurunum innilega til hamingju með árangurinn og góðs gengis í undirbúningum.
Þórgunnur Anna Örnólfsdóttir söngkona mun einnig koma fram á tónleikunum í vor en hún var einn sigurvegari keppninnar 2022 en gat af óviðráðanlegur orsökum ekki komið fram þá.
Tónleikarnir fara þann 25.maí kl.19:30 í Eldborg í Hörpu. Hægt er að kaupa miða hér.